Etterlyser asfaltering i Ølve

I midten av mars sendte Storhaugvegen Vel ved formann Aksel Lunde e-post til Kvinnherad kommune. Temaet dreia seg om asfaltering.

– Asfalten her på Ølve er etterkvart blitt veldig dårleg. Me vart veldig glade då me oppdaga merking som tilsa at det skulle asfalterast, men det har ikkje skjedd noko meir. No håpar me at dette blir teke tak i no når våren kjem og asfaltsesongen startar, skreiv Lunde, og la ved ein presentasjon i tekst og bilete for å visa tilstanden.

Sjå under eitt

Allereie nokre dagar seinare forfatta einingsleiar Terje Natland eit svar. Han stadfestar at vegen vart merka for asfaltering i fjor, men av ulike grunnar vart arbeidet utsett.

– Vi er klar over tilstanden på asfalt i feltet. Men vi har ein del anna arbeid som må utførast i feltet, mellom anna opparbeiding av snuplass for bossbil/brøytemannskap/andre store biler. Dette og noko grunnarbeid ein del stader på veganlegget, slik at levetid på asfalt blir så lang som råd, må utførast før vi legg nytt dekke, opplyser Natland.

Han legg til at det også er andre stader i Ølve der det må utførast arbeid før ein legg asfalt.

– På grunn av riggkostnader må vi sjå dette under eitt. Vi er derfor litt usikre på om vi klarer å få unna alt i år, både ut frå tilgang på mannskapar og på grunn av budsjettsituasjonen. Når vi gjer noko må vi få mest mogeleg ut av midlane våre, understrekar Natland.

Svaret verkar ikkje å ha kome fram til Storhaugvegen Vel, for i slutten av mars etterlyste Aksel Lunde svar.