Etter vel 3500 dugnadstimar er storstova endeleg klar til bruk

– Det fanst jo allereie ei sag i Skålafjøro då Nyasago vart bygt av Skaalurens skipsbyggeri tidleg på 1900-talet. Den som stod der allereie var eigd av baronen, og han vart rett og slett for dyr, fortel Leif Tore Nedrevåg og Anders Jordal, lett humrande.

Då Nyasago skulle fjernast frå Skålafjøro fekk Interesselaget for galeas «Gurine» spørsmål om å overta bygget, og ta ansvaret med å flytta det.

Laurdag 15. juni 2019 vart bygget løfta opp frå grunnen den hadde stått på i meir enn hundre år, for å blir flytta til nyafjøro - Gurinefjøro - i sin heilskap.

Mange timar arbeid bak

– Me hadde grunnmuren klar her, det var litt av ein prosess. Me har vel 3500 dugnadstimar på dette, minst, slår Nedrevåg fast.

Og utover synfaringa blir det klart at desse dugnadstimane også kan reknast som rein kvalitetstid for dei som har vore involvert. På huset har dei på det jamne vore 8-10 personar i sving, sjølv om den mest ihuga dugnadsgjengen tel om lag 12 mann. Den hardaste kjernen av desse tel 6 stykke.

– Me har teke vare på det gamle, så all berekonstruksjonen er original. Råbygget er altså det same, men me har kledd opp utvendig og panelt innvendig, sett inn nye vindauge, dører og lagt nytt golv, fortel Jordal.

– Heilt naudsynt

I tillegg er det sett inn to toalett og nytt kjøkken i første etasje. Kjøkkenet har til og med dampmaskin som lett skal kunne gjera det reint etter større selskap i det flotte forsamlingslokalet. Nytt brannanlegg er også blant dei naudsynte oppgraderingane som er gjort i huset.

Oppe er det kontor og kaffistova, verkstad og lager. Desse areala er heilt naudsynte for å kunne ta vare på «Gurine», oppbevara segla hennar og utføra vedlikehaldsarbeidet som trengs gjennom året.

Interesselaget ser seg såleis som heldige som har fått Nyasago på plass, for det er langt frå alle som skyttar gamle skuter som har lokala som trengs til slikt tilgjengeleg.

– Ideen er jo å gjera huset tilgjengeleg for ålmenta. Me vil at Nyasago skal bli ein plass for heile bygda! Og allereie har det vore stor førespurnad om å nytta forsamlingslokalet til ulike arrangement og selskap, smiler karane nøgd.

Neste steg: uteplassen

Visjonen for området stoppar ikkje der, og når dei no er ferdige med huset og det innvendige er klart, er det uteområdet som står for tur.

– Det vil koma badstove og benkeplassar ute, og me vil leggja til rette for ein enno betre badeplass: me har jo allereie ei naturleg sandstrand her! fortel Jordal med stort engasjement.

Sjølv om korkje Jordal eller Nedrevåg vil tittelera seg som særskilt ivrige badenymfer, ser dei fram til å leggja til rette for at innbyggjarane i bygda skal ha ein fin badeplass. Eit trappeamfi vil gå frå uteområdet ved Nyasago til fjøra, og det vil dessutan bli lagt til rette for ei scene mot slippen. Det vil også koma ein kai, som både vil skapa ei lun strandsone, samt fungera som den staselege Galeasen Gurine sin naturlege båtplass.

Ynskjer fleire med på drifta

Kristel Christensen har laga eit bilete som syner framtidsvyene for området. Desse vyene vonar gjengen å ha ferdigstilt til neste sesong. Den betydelege potten med dugnadstimar vil såleis auka monaleg i fleire år framover.

– Me blir vel ikkje arbeidsledige med det første, smiler Kjell Magne Haugland då han kjem ut frå kontoret i andre høgda.

– Ja, no når Nyasago er ferdig er me veldig interesserte i å få fleire med oss på å drifta huset. Så om nokon har lyst å vera med å skipa i stand arrangement og slikt her er det berre å ta kontakt, inviterer Nedrevåg.