Etter to års fråvær er vårmønstringa endeleg tilbake
Etter to år med koronaavlysingar vert det endeleg klart for blankpolerte doningar på Husnes 1. mai i år.
Publisert
Smittesituasjon og restriksjonar har sett ein stoppar for dei to siste utgåvene av Amcar-klubben si tradisjonsrike vårmønstring i Husnes sentrum, men i 2022 er dei klare for å igjen fylla Husnes sentrum med hestekrefter og blankpolerte doningar på to og fire hjul.
– Endeleg vert det vårmønstring igjen, seier Truls Skeie i Amcar Kvinnherad.
Annonse
Sjølv om det har vore to års pause, vert årets 1. mai-arrangement mykje likt som tidlegare utgåver. Det vert oppstilling av bilar og motorsyklar på parkeringsplassen utanfor Rema 1000, og sjølvsagt premiering av dei finaste bilane.
– Det er mange som arrangerer 1. mai, så vi er i konkurranse med både Haugesund og Bergen. Men vi har eit stort miljø, og dette er jo blitt ein tradisjon på Husnes og vi har mange faste som kjem. Og vi har allereie fått fleire bestillingar, så dette blir bra, seier Skeie.
Sjølv om det er Amcar-klubben som arrangerer, treng ein ikkje ha amerikanar for å ta turen på vårmønstringa.
– Nei, her er det ope for alle typar køyretøy og doningar. Så det er berre til å kasta seg rundt og bli med, seier Skeie.
