Erstatningssummane er sett
27. september vart slutninga i samband med utbygginga av gang- og sykkelvegen i Herøysundet avsagt.
Publisert
No er forhandlingane med grunneigarane som har vore råka i samband med utbygginga langs fylkesveg 500 i Herøysund gjennomført.
Hovudforhandlinga fann stad på Husnes 15. august 2022. Denne dagen fekk partane forklare seg i saka, og det vart vidare gjennomført ei synfaring på staden.
Annonse
Erstatningskrava kom frå Rune Slåbakk Volden, S Rødsten Bilforretning og Bjarne Berge. Sistnemnde sitt krav vart heva 19. august då partane kom til ei semje.
Ikkje medhald for tap av leigeinntekter
Vestland fylkeskommune og Volden har inngått avtale om erstatning som omfattar alle erstatningspostane forutan «eventuell erstatning for mellombels erverv av 406 m2 areal i samband med anleggsarbeidet.»
Volden kravde òg erstatning for tap av leigeinntekter, noko han ikkje fekk medhald i.
Annonse
«Volden har vist til at han har inngått ein leigeavtale med leigetakar som skulle leiga bygget frå juli 2021 for å drive butikk og gatekjøkken i bygget. Det mellombelse grunnervervet gjorde at butikken ikkje lenger hadde tilstrekkelig parkeringsareal og leigeforholdet starta ikkje opp», heiter det i sakspapira.
Tapet vart av Volden oppgitt til å vera 300.000 kroner. Minus utleigeprisen av bygget til entreprenør, på 8000 kroner i månaden, enda nettokravet på 204.000 kroner.
Retten sette erstatninga til kroner 0, då dei meinte at det ikkje var sannsynleggjort at kontrakten som vart lagt fram ville blitt gjennomført.
Avstått grunn, plunder og heft
S Rødsten Bilforretning vart mellom anna imøtekome i kravet om erstatning for varig avståing av grunn. Retten slo fast at verdiskilnaden etter ekspropriering av dette området var på 475.000 kroner, og etter skjønn vart erstatninga sett til 600 kroner per kvm.
Det er også sett fast at bedrifta får 100.000 kroner i erstatning for ulepmer og utgifter knytt til «tapt parkeringsareal, støv, plunder og heft» under anleggsperioden.
Annonse
Bilforretninga kravde vidare erstatning for omsetningstap, grunna redusert innsyn til verksemda sitt parkeringsareal. Nemnde areal har hatt til siktemål å vera salsfremjande, eit argument som retten ikkje tok til følgje.
Av rettsavgjersla kjem det til sist fram at Vestland Fylkeskommune vil erstatta sakskostnadane til dei saksøkte med følgjande summar: 27.500 kroner til Rune Slåbakk Volden, og 83.500 kroner til S Rødsten Bilforretning AS.
