Er på vakt mot smitteutbrot

Beredskapsgruppa til Kvinnherad kommune er på vakt mot nye koronasmitta innbyggjarar, og aukar testkapasiteten frå måndag av.

Under ein pressekonferanse på torsdag åtvara beredskapsgruppa til kommunen mot å tru at epidemien er over, og understreka at avstand, handhygiene og smittevern framleis må gjerast skikkeleg.

Ordførar, kommunedirektør og kommuneoverlege var alle til stades då status så langt, samt vurderingar av tida framover vart delte.

Rigga for hausten

– Eg er først og fremst glad for at denne sommarsesongen har gått over all forventning, trass i mange besøk i kommunen, og at me har omgitt oss med mange ikkje-kvinnheringar. Me har klart å halda smitten borte, takka vera mange som har gjort godt arbeid på mellom anna eteplassar og butikkar, slo ordførar Hans Inge Myrvold fast då han opna pressekonferansen.

Han peika på at reising og litt frislepp i sinnet har gitt ein smitteauke i landet

– Me gjer no grep lokalt for å unngå at dette skal råka oss. Fokuset er framleis på dei eldre, at dei som bur på institusjonane er trygge, og at barn og unge som no skal starta på skule har særskilt fokus framover, la han til.

Kommunedirektør Ragnhild Bjerkvik understreka at Kvinnherad kommune som organisasjon er rigga for hausten som kjem. I første omgang er dei opptatte av at skular og barnehagar opnar som planlagt.

– Me ser at situasjonen utviklar seg i nabokommunar, og me må vera førebudde. Difor aukar me testkapasiteten. Det har vore viktig for meg at alle har fått tatt ferie, etter ein krevjande vår for alle. Såleis var det godt for oss at me ikkje fekk eit utbrot i sommar, slik at ferien varte for folk, sa ho.

Testtelt

Eit av tiltaka for å kunna testa meir, er etableringa av eit kommunalt testtelt ved Husnestunet.

– Me reknar med å få opp teltet på søndag, og kunna starta testinga frå måndag av. Fleire ynskjer å testa seg, mellom anna fordi mange har vore ute og reist. Staten ber kommunane ha kapasitet til å testa fem prosent av befolkninga i veka. For oss betyr det at me må kunna gjera rundt 130 testar til dagen. Eg trur rett nok ikkje at det blir aktuelt med så mange, sa kommuneoverlege Glenn A. Opland under pressekonferansen.

– Det er ikkje noko frislepp. Kjenner du symptom, så ta eit steg tilbake og ta dine forholdsreglar. Ikkje oppsøk slekt og vener, supplerte Bjerkvik.

Det er ikkje påvist nye tilfelle i Kvinnherad i sommar. Totalt er i underkant av 1000 personar testa i Kvinnherad, og oppmodinga at ein skal testa seg med ein gong ein kjenner symptom.

– Hovudsymptoma er feber, tungpust, hoste, sår hals, tap av smak og lukt vanlege symptom.

Det er gode sider på FHI (ekstern lenke), og me oppmodar publikum til å nytta dei, sa Opland.

Han understreka at når ein testar seg, så er ein i karantene.

– Sjølv om du får tilbake negativ prøve, skal du vera i karantene til du har vore symptomfri i éin dag. Dei som er positive får telefon frå kommuneoverlegen, for å få starta smittesporing. Kommunen har no gått til innkjøp av programvare for smittesporing som skal letta arbeidet med det for oss, opplyste kommuneoverlegen.

Testteltet er meint for dei som har milde eller moderate luftvegssymptom. Dei som har alvorlege symptom må framleis gå via legen sin.

– Ein må gå gjennom koronatelefonen og få ein timeavtale. Du må ha ein grunn for å få testa deg, og du skal ha ei tid for oppmøte. Det gjennomfører me både med tanke på trafikkavvikling, men også for smittevern, seier Gunn Tove Petterteig i beredskapsgruppa om testteltet som er laga etter modell frå mange andre stadar i landet.