Er på plass i Oslo: – Skal inn og finna kontor seinare i dag

– Kjersti ringte i går kveld, så eg fekk eit varsel om kva som venta. Eg såg utviklinga gjennom dagen, men onsdag morgon hadde eg eigentleg avskrive dette.

– Når reiser du over?

– Eg er i Oslo allereie, og skal innom Stortinget i ettermiddag og finna meg eit kontor. Eg startar allereie på måndag. I ein fase vil eg fungera i godt og tett samarbeid med varaordføraren, medan ein avklarar dei ulike forholda heime, fortel Hans Inge Myrvold på telefon frå hovudstaden.

– Kva skjer med ordførarjobben i Kvinnherad no?

– Lokallaget har jobba godt med dei spørsmåla som kjem når dette (plass på Stortinget, journ.merk) blir ei mogelegheit. Slik eg ser det for meg, må eg kalla inn eit ekstraordinært kommunestyre som skal handsama min fritakssøknad, og avklara spørsmåla kring ordførar og varaordførar. Det kan fort skje digitalt og det er ein fordel for alle om det blir gjort relativt kjapt. Det skal vera eit ordinært møte om 14 dagar, og me vil sjå kva som er mogeleg før den tid, forklarer Myrvold.

Spørsmålet kring ordførarvervet er sett på spissen dette: Skal Myrvold søkja permanent eller mellombels fritak.

– Eg har tenkt mykje på kva eg vil gjera, og vil henta litt meir råd og rettleiing frå stortingsgruppa på dette. Det er ei mindretalsregjering, som er meir sårbar regjering, med dei atterhalda som ligg i det. Partigruppa heime blir langt på veg avgjerande på korleis me riggar oss. Det er viktig at potensielle kandidatar i Kvinnherad får dei romma og mogelegheitene som ligg i dette. Førebels er det er ein omstendeleg, usikker og uavklart situasjon, meiner den avtroppande ordføraren

Det som er sikkert, er at Myrvold går ut av formannskapet.

– Eit nytt Senterparti-medlem må uansett inn i formannskapet, dermed blir det suppleringsval der. Vidare organisering blir enten val av ny ordførar eller ny setteordførar. Eg vil anstrenga meg for å bidra inn i kommunestyresamanheng, for eg føler ei sterk forplikting til veljarane som valte oss inn i 2019, seier Myrvold.

Kva som vil skje ved ordførarvalet om to år har han ikkje tatt stilling til.

– Eg er trygg på at eg kjem til å vera i Oslo ei god stund no. Det er brei støtte til regjeringa i Stortinget. Eg må likevel forhalda meg til at dette ikkje er permanent så lenge eg er i Stortinget som møtande vararepresentant. Det har vore alt for Kvinnherad i to år, no er det alt for Kvinnherad og Norge. Eg gler meg til å vera døropnar for Vestland og Kvinnherad, forklarer han engasjert.

– Dette blir ei omvelting, ja, men eg har heldigvis den vesle erfaringa eg fekk i fjor. Eg er veldig motivert, og veldig glad for tillita i partiet og frå veljarane. Eg kjem til å vera veldig mykje heime, og kjem til å involvera meg i valdistriktet eg er valt inn for. Eg skal heim i helga, og så tilbake til Oslo på måndag. Det blir litt overlapping mellom meg og varaordføraren no framover, og eg gler meg uttruleg mykje, sluttar Myrvold.