Er du nyfiken på Dungeons&Dragons?
Anten du er ein erfaren spelar eller alltid har hatt lyst til å læra, for fyrste gong i Kvinnherad kan du no vera med på Dungeons&Dragons-treff.
I regi av Fri kultur Kvinnherad og Christian Meaas Svendsen som primus motor, kan du siste helga i november i Rosendal få vera med og spela det legendarisk spelet. Men kva er Dungeons&Dragons lurer du kanskje på?
På sine sider skriv Fri kultur Kvinnherad at D&D er eit av dei mest kjende rollespela i verda, og som fyrst såg dagens lys allereie på byrjinga av 70-talet.
Annonse
– Dungeons&Dragon-universet minner på mange måtar om Ringenes Herre og/eller Game of Thrones, referansar som er meir eller mindre kjent for dei fleste. Her finst menneske, dvergar, alvar, drakar og ei heil rekkje andre snille og ikkje fullt så snille skapningar. Men Dungeons&Dragons er langt meir enn det namnet skulle tilseie og er dessutan svært fleksibelt, seier FKK.
Berre starten
Alle er velkomen til å delta, anten du er nybyrjar eller erfaren spelar. FKK legg opp til det dei kallar for ein «one shot», eller såkalla mini-eventyr, som er designa for å gjennomførast i løpet av ti timar.
– I tillegg til sjølve spelinga får deltakarane sjølvsagt også høvet til å bli kjend med kvarandre, ta seg ein tur i Rosendal og slappa av. Det er jo trass alt eit sosialt arrangement, fortel dei på sine sider.
Annonse
– Likevel vert det nokre intense dagar der terningar skal trillast, holer utforskast, låser (forsøkt) dirkast opp, fiendar skal kjempast mot og alliansar bli danna. Me har ambisjonar om å laga nokre heftige arrangement i åra som kjem, og håpar at dette er starten på eit langt og innhaldsrikt eventyr, avsluttar dei.
