– Er bygd som turløype

Som Grenda har skrive tidlegare, ville Veronica Thorkildsen Thorsen stilla fleire spørsmål om Erslandsparken i kommunestyret. Bakgrunnen var at Sp hadde motteke nokre bekymringsmeldingar. Mellom anna lurte ho på om det er ei godkjent rulleskiløype eller ei turløype.

– Dersom det ikkje er ei godkjent rulleskiløype, vil då kommunen gjera tiltak som gjer at denne også kan brukast av nybyrjarar på rulleski? Viser her til svingutbetring/nedkøyrsel», las Stein Olav Ølvestveit (Sp) opp på vegner av Thorkildsen som på det tidspunktet hadde reist frå møtet.

Diskvalifisert

Svaret frå kommunedirektøren var tydeleg.

– Løypa er godkjent som turløype fordi det er dette Ternen søkte idrettsfunksjonell førehandsgodkjenning og spelemidlar til. Det er òg turveg som står beskrive på teikningane frå Ternen som følgde med søknadane. Ei endring av spelemiddelsøknaden til rulleskiløype (frå nærmiljøanlegg-ordning til ordinæranlegg-ordning) ville diskvalifisert frå tilsegn då løypetraseen ville vore for kort (minimum 1 km). Dette er krav som prosjektet ikkje har hatt økonomi eller ressursar til å innfri. Det er òg mykje som peikar på at korkje areal eller terreng har vore tilstrekkeleg for etablering av ei rulleskiløype som hadde passa til brukarar i den yngste aldersgruppa. Det er ikkje midlar att i prosjektet, og Ternen må skaffa ekstra finansiering, eller utføra i eigen regi dersom dei ynskjer å gjera utbetringar av traseen, sa Gunn Berit Sandnes Fosse.

Totalkostnad

På spørsmålet om resultatrekneskap for prosjektet, vart det opplyst totalkostnaden no er på 16,8 millionar kroner inkludert moms. Alle byggjetrinn skal vera ferdige.

– Det siste uteståande punktet har vore gjennomføring av støymålingar, som har blitt gjennomført no i vår for å vurdera om det er naudsynt med støytiltak. Når støyrapporten er på plass, skal det ikkje vera uteståande vilkår for ferdigstilling, så kommunen reknar med at ferdigattest kan vera på plass på ettersommaren, opplyste Fosse.

Når det gjeld tryggleiken til brukarane, sa kommunedirektøren at det er montert gjerde der det er krav om det.