Enorm tru på Modige talent

Målet var å «skapa ein føreseieleg møtestad med fokus på meistring, tryggleik for den enkelte, kreativ utfalding, samt å skapa kultur saman med andre». I følgje sluttrapporten og attendemeldingane, vart dette målet nådd, og tilbodet var både meiningsfullt og viktig for dei som var med. Solheim samanfattar erfaringane frå prosjektet Modige talent som svært gode.

– Me i prosjektgruppa, og me som jobbar med UKM og med ungdom, ser eit veldig stort behov for aktivitetar som dette. Det er ikkje mykje som skal til for å skapa stader kor born og unge kan få utfalda seg kreativt og skapande, seier ho.

Likt for alle

Prosjektet starta opp i 2019, og munna ut i ei noko forseinka førestilling i oktober 2020, grunna pandemien. Då hadde Modige talent vore eit gratis aktivitetstilbod til unge mellom 5-16 år, frå heile kommunen, i 18 månadar.

Her stilte alle på lik linje, og ingen trengte å ha noko særskilt talent i botn. Mantraet var: Her skal eg kunne vera 100% meg sjølv! Det skulle lagast ei sceneframsyning, og deltakarane utførte dei ulike oppgåvene som er knytt til ein slik produksjon i fellesskap.

For Karianne var det veldig kjekt å sjå at det var ein etterspurnad, og at dei klarte å gjennomføre prosjektet trass i korona.

– For meg var det ei utelukka positiv erfaring. Det å sjå kor fantastisk dette har vore, og sett at det skapte ein forskjell for dei som var med, samt å sjå at me møtte eit behov, var veldig, veldig kjekt.

Utfordringar undervegs

Grunna Covid-19 måtte det leggjast til rette for mindre grupper, samt ein del individuelt arbeid, og det var lenge usikkert om førestillinga kunne gjennomførast for eit publikum. «Men den vart gjennomført, og ei veke etterpå stengde samfunnet ned att.» heiter det i sluttrapporten frå prosjektet.

Vidare i denne er «svakhet i strukturen» trekt fram som ei utfordring:

«Eit ynskje om å jobbe på tvers av sektorar i rekruttering og gjennomføring, gjorde det vanskeleg for prosjektgruppa. Dette då deltakarane hadde ulike utgangspunkt for deltaking. I tillegg burde kanskje styringsgruppa vore ein anna enn leiargruppa til kommunedirektøren, for å få eit styre som sit nærare dei utfordringane prosjektet stod ovanfor.»

På spørsmål om dette, meiner Solheim at avstanden mellom styringsgruppa og prosjektgruppa mogleg var for stor, og at førstnemnde såleis ikkje fekk det same innblikket i suksessen som hende «på golvet».

Viktige suksessfaktorar

Trass i utfordringane meiner Solheim det ligg eit uforløyst potensiale i prosjektet, samt i kulturhuset som arena for skapande aktivitetar blant born og unge. Ho peikar på fleire suksessfaktorar som har bidrege til at dei lukkast.

– Det var eit gratis tilbod, som såleis vart tilgjengeleg for alle mange barn og unge i denne aldersgruppa, uansett bakgrunn, ressursar og talent. Dette lukkast me veldig godt med.

Sluttrapporten peikar til sist på at Modige Talent, og alle dei involverte, kan vera ein nyttig ressurs i arbeidet med å skape eit meir inkluderande samfunn etter gjenopninga av samfunnet:

«Dersom kommunen har behov, midlar og eit ønskje om å vidareføre Modige talent, krevst det relativt små ressursar for å gjere dette. Her kan ein vise til den suksessen som allereie er skapt, midt under ein pandemi, og tenkje kva som er mogleg når samfunnet er attende til ein ny normal.»

Karianne Solheim har fått mange spørsmål frå dei som deltok på prosjektet, samt frå foreldregruppa, om tilbodet ikkje snart startar opp att. Solheim svarar då at håpet er at ho, i saman med dei, kan finna ein måte å få tilbodet til å halda fram.

Kravd at kommunen må drifta eventuell vidare satsing