Endorfiner og velvære med god helseeffekt

33-åringen frå Uskedalen seier han merkar store helsefordelar ved å driva med kuldebading og badstove. No har aktiviteten vorte rutine for han minst fem dagar i veka. Og han merkar ikkje berre god effekt på den fysiske helsa, men også det mentale:

Vart hekta - vart tilsett

– Det å kunna stå i eit ubehag ei lita stund er godt for oss. Eg synest me har blitt så reaktive: Med ein gong me møter ein ubehageleg situasjon, tek me kanskje opp telefonen og distanserer oss frå omgjevnaden. Det kan ein ikkje når ein er nede i det kalde vatnet, ler Morten Eidsvik.

– Eg lurar på om saunaen er den einaste mobilfrie sona for tida, seier Knut André Eidsvik, bror til Morten.

Morten Eidsvik bur i Bergen til vanleg, og det var der lidenskapen for badstova vart vekt.

– Eg fann ut at det finst fine badstover med utsikt og sånt, ikkje berre innestengde, morkne trehytter, som var det eg forbatt med badstove tidlegare, smiler han.

Etter kvart vart Morten meir og meir aktiv med kuldebading og badstove, og det førte til at han vart deltidstilsett ved Heit Bergen Sauna. Der oppdaga han at det stod ein mobil sauna heilt ubrukt på ei kai. Denne fekk han låna, og køyrte ho heim til Uskedalen 21. oktober.

Kjem oftare heim

– Det gjekk litt fort og gale, men Nilsen handel og butikk har vore kjempepositive, så me fekk ein plass her på kaia, og har oppbevaring for ved og utstyr her på lageret deira. Dei såg på det som eit positivt tiltak, og det er jo det som er herleg når ein vil gjera noko på bygda: Folk hjelper til, og set pris på det, fortel Morten.

Me spør om familien får sjå litt meir til Morten no som det står ei badstove i heimbygda, og han legg ikkje skjul på at det er tilfelle.

– Det set besto pris på, gliser storebror Knut André.

Det er Knut André som driftar badstova på kaia når Morten er i Bergen. 36-åringen har vore mykje i Finland, og vart interessert i sauna-kulturen der. Han fortel at veslebror Morten fekk han til å starta med kuldedusjing.

– Eg likte ikkje tanken på kuldedusjing i det heile tatt, men Morten snakka om at han berre kjente seg betre og betre i kropp og helse etter at han starta med kalde dusjar om morgonen. Og så er me jo brør, og brør vil vel alltid konkurrera, ler han.

Inviterer lokale lag og bedrifter

Eidsvik-brørne oppfordrar folk til å lesa meir om helsefordelane ved kuldebading og sauna, og nemner både trening for blodkar, raskare heling av skadar, god førebygging mot hjarte- og karsjukdomar, samt at aktiviteten i seg sjølv kan leia til ein sunnare livsstil.

– Dei endorfina og velværet ein kjenner etterpå, det sit lenge i kroppen. Då kjenner ein kanskje mindre behov for å ta den sjokoladen eller den pilsen på kveldstid, meiner Knut André Eidsvik.

Folk må vera raskt ute om dei vil prøva badstova på kaien bakom Spar. Ho skal førebels berre stå til 21. desember, kan brørne fortelja.

– Etter det skal ho flyttast. Men dersom badstova vert populær før den tid, er det lettare å vurdera om dette kan bli eit permanent tilbod. Me håpar at lokale lag eller bedrifter vil nytta høvet og bestilla badstova til teambuilding eller styremøte, smiler Morten Eidsvik.