Endeleg skal det byggjast ny bru i Ølve

Vestland fylkeskommune har bestemt at Husa bru i Ølve skal rivast og erstattast med ei ny. Arbeidet skal starta opp i oktober.

Husa bru i Dalsjøen i Ølve er smal og delvis skadd, i tillegg til at svingen inn på brua er vanskeleg for store køyretøy. Staden kan også vera svært glatt om vinteren. Brua har såleis vore ein gjengangar i Grenda sine spalter i årevis. Attende i september 2016, på det historiske kommunestyremøtet då Kvinnheradpakken vart samrøystes vedteken, konstaterte Knut Johannes Helvik (H) at det er mange dårlege bruer i Kvinnherad.

– Den aller dårlegaste er Husa bru i Ølve. Vi bed om at den vert prioritert fyrst når vi skal skaffa brumidlar, sa han og la fram eit oversendingsforslag.

Rast ut

I økonomiplanen for 2019 vart det sett av 1 million kroner til prosjektering av brua. I juni 2019 gjennomførde Statens vegvesen hovudinspeksjon av brua og registrerte då undergraving av fundamenta. I oktober same år meldte forbipasserande frå om at deler av eine fundamentet hadde rast ut. I desember 2020 fortalde ordførar Hans Inge Myrvold (Sp) at fylket hadde sett Husa bru høgt på lista over prioriterte tiltak, og at det nett var blitt halde prosjekteringsmøte.

Men seinast i mars i år understreka Sølvi Ulvenes (H) at brua såg ut som før.

– Den har fylket lova å fiksa, men det har enno ikkje skjedd noko, sa ho.

Også sektorleiar Sigbjørn Øye stussa over at prosjektet ikkje var utført.

– Det er veldig løye at dei ikkje har kome i gang, for brua er i litt kritisk tilstand. Så dette skal eg purra på, lova han.

Grenda tok då kontakt med fylket for å finna ut meir om saka, men fekk aldri svar frå rette vedkomande.

Skal kunna passera

Men no er faktisk prosjektet lyst ut på anbodsdatabasen Doffin.

«Brua skal utførast som plasstøypt-betongbru, med spennarmering og asfaltdekke. Plasstøypte landkar skal fundamenterast på stålkjernepelar til fjell. Brua vert bygd i kurve, og tilførselsveg tilpassast brua med tørrsteinsmur og plastring på sjøside», står det i dokumentet.

Vidare vert det forklart at den gamle brua skal rivast for å gje plass til ei ny. Mellombels omkøyringsveg skal byggjast oppstraums eksisterande bru, tett på hus.

«Trafikken skal kunna passera i heile byggjeperioden», vert det understreka.

Tilbodskonferanse vert gjennomført 5. september. Oppstart av kontrakten er sett til 24. oktober, medan sluttdato er 1. november neste år.

Ifølgje nettstaden Veier24.no fortel den geotekniske rapporten om dårlege grunntilhøve. Dessutan kan det ikkje føregå arbeid i elva i oktober og november grunna gytevandring for fisken. Heller ikkje i perioden mars til 15. mai grunna smoltvandring.