Endeleg kunne leiken sleppast laus igjen
I to år har barna i Omvikdalen barnehage gått og venta på å ta i bruk uteområdet. Tysdag var det etterlengta snorklypp for den nye boltreplassen.
Publisert
Sist oppdatert
Det var ei tydleg forventning som prega både barnehagebarn og vaksne då det nærma seg opning av det nye uteområdet til Omvikdalen barnehage tysdag. Barna har med lengsel i blikket kunna sjå nye disser, sklier og andre leiker koma på plass, men ikkje før denne dagen skulle dei få ta dei i bruk.
Høge blyverdiar
Annonse
Barnehagestyrar Jeaneth Rangsæter Sundal var seremonimeister under festdagen, der Helene B. Skeie og Eirhild Leganger fekk æra av å klyppa snora i stereo før opninga.
– Me gler oss til å bruka dei nye leikene, og denne dagen er verd å markera, for me har venta lenge på å få ta området i bruk, sa Jeaneth før saksa delte snora.
Til Grenda fortel ho om eit todelt prosjekt som har tatt tid å sluttføra.
– Det byrja med utviding av parkeringsplassen. I mars 2019 byrja dei å riva skura mellom parkeringsplassen og uteområdet, og me tok vekk leikeapparata for me måtte forskyva leikeområdet. Det var ein haug her kor ein fann for høge blyverdiar og forureining i grunnen, så haugen måtte fjernast, forklarer Sundal.
Annonse
I tillegg til at det tok tid, var det også med på å gjera uteområdet flatare.
– Me var opptatte av at det ikkje var ein skuleplass me ville ha, og ynskte heller nokre småhaugar, steinar og litt variert terreng. Det er TM Anlegg som har gjort arbeidet med leikeområdet vårt, og me er veldig nøgde med det me no har fått, smiler ho.
Full barnehage
Barnehagen i Omvikdalen har 49 barn fordelt på 60 plassar.
– Me er fulle, og har hatt venteliste i fleire år. Det er på grunn av utvidinga i byggjefeltet. Det blir spennande å sjå korleis utviklinga går framover, for det er nedgang i barnetala over heile fjøla i Kvinnherad, seier Sundal.
Det affiserer ikkje barna som no kan boltra seg i nye leiker. Disser, vipper og sklier. Barn på trehjulsykkel susar i full fart forbi barnehagestyraren.
Annonse
– Her var eigentleg som ei flystripe tidlegare. Det var bul i gjerdet etter kollisjonane, smiler Sundal.
For dei tilsette er også tilgjengeleg uteområde med på å gjera kvardagen kjekkare.
– Det har merkast at me ikkje har kunna leika rundt husnovene, slik me har kunna før. Og spesielt når koronapandemien har tvunge oss til å halda oss i kohortane våre, har det blitt mindre høve til å leika på tunet på tvers gruppene, seier barnehagelærar Mariann Søllesvik mellom bolleservering og saftskjenking.
