Endeleg klart for jubileumskonsert

Sidan august har dei øvd iherdig fram mot det som endeleg er i ferd med å skje. Då dei starta øvingane att, hadde kinosalen i kulturhuset vore prega av Strupebandet sitt fråvære sidan i vinter.

Trass i tause månadar, kan dei sjå attende på over førti år, kor dei har hatt ti ulike dirigentar, samt sunge seg gjennom eit vidt og breitt repertoar saman med desse. Det er desse mangfaldige åra som no skal speglast i jubileumskonserten.

«Jubileumskonserten vil spegla ein del av repertoaret som har følgt koret i fleire år, men det blir også mange nye ting å høyra. Det har uansett vore stor stemning for å laga litt fart og god stemning i programmet etter alle månadene med stillstand.

Det blir derfor mykje svingande musikk å høyra, men også inderlege, meir nedtona satsar - slike er alltid med, ikkje minst rundt juletider. Elles blir det både dans til eit vakkert instrumentalnummer, og mange soloar, både i koret og orkesteret.» skriv Kari Tarberg i ei pressemelding.

Måtte prioritere vekk julemusikken

Vidare unnskulder dei seg på førehand for at programmet ikkje vil innehalda julemusikk, når konsertane kjem så tett opp i advent, og det trass alt har vore tradisjon.

«Men det måtte bli sånn denne gongen, sidan ein berre har gått og venta på å få øve ferdig og framføra jubileumsprogrammet. Julemusikk blir det dessutan høve til å nyta i same salen, med andre aktørar utover i desember.» skriv dei vidare.

Det er Bente Sjo som skal vera konferansier, og Strupebandet stiller med sitt faste orkester: Hallgeir Tvedten, Roy Faste Særsten og Audun Tvedten, samt dei «faste» gjestene sine: Gjermund Fredheim og Remi Sjo.