Endeleg er startdatoen klar: Og Trygve Øvstebø skal leia arbeidet

Allereie i august 2022 skreiv Grenda om dugnadsgruppa i Uskedalen som prøvde å redda det gamle museumshuset på Rød medan dei samtidig etterlyste hjelp frå kommunen før det var for seint. Spolar ein så fram til oktober i fjor, så hadde dugnadsgruppa framleis ikkje høyrt noko og etterlyste nok ei gong svar frå kommunen.

I eit svar til dugnadsgruppa fekk dei så vita at kommunen jobba med å finna rett person til jobben.

– No ventar me berre på action, sa talspersonen for dugnadsgruppa Audun Eik då i oktober. Så like før jul vart det omsider fart i sakene, bortsett frå at ein framleis må venta endå litt til.

Ikkje spesielt

Fleire hadde blitt inviterte til å bli med i konkurransen om restaureringsprosjektet, men dei einaste som melde seg på var også dei som fekk oppdraget, nemleg åkrabuen Trygve Øvstebø saman med bror sin Jan Øvstebø, samt også Jon Sigvald Tjelmeland.

Men sjølve arbeidet startar ikkje før i september.

– Det er eg som har ansvaret, men eit av krava var at eg fekk ha desse to med meg. Elles hadde eg aldri teke det på meg, sa Trygve Øvstebø då me snakka med han på telefon.

– Eg og bror min har no drive med dette heile tida, men han ungdomen er veldig interessert i å læra. Jaja, ungdom for meg i alle fall, han er no tredve, men han er veldig flink og har ein del erfaring allereie, la han humrande til.

I fylgje prosjektbeskrivinga har taket på museet eit originalt nevertak med steinheller oppå som så beskyttar det gamle taket. Nevertaket skal også vere det einaste kjende av sitt slag i Sunnhordland, men i fylgje Øvstebø byr ikkje det på noko særleg stor utfordring.

For Øvstebø er takrestaureringa på Rødtunet i fylgje han sjølv ein av dei enklare jobbane han tar på seg.

– Det er jo slikt eg jobbar med heile tida, gamle bygningar, det er ikkje noko spesielt med det. Men i og med at det er eit museum så er det jo ting som må takast omsyn til og som skal tilbakeførast. Då må ein sjølvsagt unngå å øydeleggja uunnverlege ting, forklarte Øvstebø.

– På Rød er det eit nevertak som skal takast godt vare på, men det er jo ikkje vanskeleg. Det er mykje enklare enn mange andre ting eg jobbar med, så eg ser ikkje på det som noko spesielt, fortsette han.

Stagnert forfall

Det er travle tider for Åkrabuen. I fylgje Øvstebø er det mange som er interesserte i å få restaurert diverse gamle bygningar. Akkurat no er den nevedyktige åkrabuen i Omvikdalen og jobbar på eit spanande prosjekt der.

– Eg jobba mange år inne i Åkrafjorden med å restaurera og fiksa gamle kvernhus, båthus og ulike ting. Der var det også ein del kulturminne, men det var også mykje som skulle bli til hytter der den raude tråden var at dei ynskte å ta vare på historien i det, sa Øvstebø.

– Eg har også vore med i Omvikdalen og jobba på stampo som vart bygd der inne, men akkurat no så jobbar eg med å lafta ei mølla der, sa Øvstebø.

Øvstebø blir også glad når han får vita om jobben som dugnadsgruppa i Uskedalen har lagt ned for å redda huset på Rød frå totalt nedfall.

– Dersom ein ikkje tek vare på taket på ein bygning, så er det jo heller ikkje noko å ta vare på. Så utan arbeidet deira så hadde nok ikkje huset eksistert lenger antakeleg, og eg er veldig glad for arbeidet dei har gjort. Berre det å få stagnert forfallet er til stor hjelp, avslutta han.