Endeleg «ekte» publikum!
Torsdag 7. oktober var det - for første gong etter pandemien - duka for kulturskulekonsert med ekte publikum. Det ekte publikummet bestod av om lag 50 små og store frå Undarheim og Myrane barnehage på Husnes, og dei lot seg riva med.
Publisert
Sist oppdatert
Fire minutt før konserten starta i blackboksen, møtte Grenda på ein energisk marimbagjeng. Dei gav eit samstemt «ja» på spørmål om dei gledde seg, og dei var allereie ikledd sine fargerike drakter.
– Det er kjekt å spela, og dessutan får me fri frå skulen, utdjupa dei.
Annonse
– Kva kan publikum forventa på konserten då? undra bladfyken.
– At me skal oppføra oss og spela fint, kjem det kvikt frå gutane som måtte venta heilt til sist for å framføre låtane sine; «Zimbabwe» og «In the jungle» frå Løvenes konge.
Då Marimba-orkesteret endeleg fekk slå seg laus, var det få born i salen som klarte å sitja stille.
Elles vart barnehageborna underhaldt med eit breitt spekter av uttrykksformer; strykeorkester, song, ukulele, piano, trommer, og dans. Det vart også spelt opp til allsong, der barnehageborna stemte godt i.
Annonse
– Det einaste me har gjort av konsertar under pandemien er nokre pop-up konsertar på Husnes storsenter, så dette er den første skikkelege konserten me har, sa kulturskulelærar Ingvald Nilsen, medan han freista å halde koret i tøylane.
Dei var ivrige etter å sjå kven som kom inn i salen då det var opna opp for publikum, og var tydeleg utålmodige for å opptre etter gamalt. Songane dei framførte var Suppegjøk, Fin tid og Bæ Bæ lille Lam. Den siste var publikum godt kjend med, og dei song med.
Spanande med konsertdebut
Dei tilsette ved Kvinnherad Kulturskule var veldig glade for at det endeleg var mogleg å invitere til ekte publikumskonsert att. Særleg fordi at det er på denne måten elevane kan kjenne på spenninga og kjensla av å stå på ei scene.
– For det er ikkje berre det å stå framme å vise det ein har lært på instrumentet som er viktig. Ein utfordrast òg på å være tolmodig og stille, og vente på tur sjølv om nerver og iver er i høgspenn. For nokon var dette den første konserten med «ekte» publikum, og dei kunne melde at det var noko av det mest spennande og kjekke dei hadde vore med på, forklarar Silje Dyrseth Eide, inspektør i kulturskulen, etter fullført konsert.
Ho legg ikkje skjul på at kulturskulen er glade for at landet har opna att, og ser fram mot konsert- og førestillingsprogrammet fram mot jul. Særleg legg dei no planar for ei stor juleframsyning.
Annonse
– I år vil me blant anna ha ei større framsyning, med ein raud tråd gjennom det heile, i tillegg til ei stor danseframsyning og fleire mindre julekonsertar og framsyningar. Me gler oss til å visa fram dei flotte elevane me har, slår Eide fast.
