Endå eit halvår med vekst for Grenda

Frå andre halvår 2021 til andre halvår i fjor, har Grenda hatt ei auke i opplag på 190. Fordelt utover vil det seia ei auke på 137 fyrste halvår i fjor, mot 53 andre halvår. Det vil også seia at dette er den 7. målinga på rad der Grenda er i vekst.

– Dette er jo fyrst og fremst veldig kjekt. Det er ei ny tillitserklæring til dei tilsette og avisa, og eit godt klapp på skuldra for jobben me prøver å gjera kvar einaste dag. No har me hatt ei auke i opplag på 627 sidan 2019, det vil seia nesten 30%. Det tykkjer eg me kan vera stolte over, seier redaktør Håvard Sætrevik.

– Samtidig så forpliktar det også på den måten at me no har endå fleire kundar, me har større forventingar til oss, og det må me også forvalta på best høveleg vis, seier han vidare.

Frå vogge til grav

Lokalavisene er framleis veldig viktige for folk i heile Norge. Det syner opplagstala, skriv Landslaget for lokalaviser (LLA) i ei pressemelding.

Tomas Bruvik er generalsekretær for LLA, og er godt nøgd med tala som vert lagt fram torsdag.

– Folk lever jo livet sitt lokalt og lokalavisene lagar god og viktig journalistikk frå bygder, tettstader og bydelar landet rundt. Avisene våre følgjer folk frå vogge til grav. Undervegs løfter me fram relevante nyhende, kultur, idrett, næringsliv, og ikkje minst det flotte lag- og organisasjonslivet, seier Bruvik i pressemeldinga.

LLA sine 100 medlemsaviser, der blant andre Grenda er med, aukar totalopplaget med 1687, det vil seia 0,5 prosent.