Endå eit branntilløp - jobbar med å identifisera gjerningspersonane
Tilfeldig forbipasserande oppdaga eit branntilløp i nokre bosdunkar i Skålafjæro i 3-tida natt til laurdag. Tre ungdomar vart observert springande frå plassen.
– Me ber om at alle foreldre tek ein prat med ungdomane sine om kva det er som skjer når dei er ute på nattestid. Dersom dette held fram, så er faren for større skade betydeleg, seier Sigurd Børve.
Han seier at politiet ser på dette som svært bekymringsfullt, og meiner det truleg handlar om manglande konsekvensvurdering frå gjerningspersonane. Dei arbeider no med å identifisera kven som stod bak påtenninga, men ber om tips og samarbeid frå folk i Rosendal som kan ha observert eller veit noko.
Annonse
Treng engasjement
Dei forbipasserande fekk sløkt brannen lett med vatn, så tilløpet førte ikkje til noko utrykking. Men politiet tek saka på stort alvor, i samband med ei rekke andre branntilløp i Rosendalsområdet dei siste månadane.
– Me skal følgja opp dette nærmare, men me treng òg eit engasjement frå folk i Rosendalsområdet for å få slutt på dette, seier Sigurd Børve.
Elles melder Børve om ei roleg helg for politiet.
