Endå ei storinvestering – 200 mill. til nytt støyperi

Berre dagar etter at Hydro offentleggjorde at dei skal bruka 100 millionar kroner på nytt garderobebygg med brannstasjon, kjem endå ei gladmelding. Torsdag føremiddag vart det kjent at selskapet også skal investera for 200 millionar kroner i nytt støyperi på Husnes.

Skal investera 100 millionar i nytt bygg: – Må tilpassa oss verkelegheita

«Vedtaket om å investera i ny støypelinje for aluminiumsblokker er ein del av Hydro sin strategi for utvikling av aluminiumsverka i Norge, og vil auka fleksibiliteten i ein marknad prega av svingingar», står det i ei pressemelding.

Hydro Husnes produserer lågkarbonaluminium primært til den europeiske bygge- og anleggssektoren og bilindustrien. Den nye støypelinja for aluminiumsblokker vil gjera det mogleg å variera produksjonen i periodar med lågare etterspurnad etter press- og smibolt, som er verket sine hovudprodukt.

Betre rusta

– Vi fortset å investera i framtida til verka i Norge, sjølve grunnfjellet i strategien vår om å ta leiinga i det grøne skiftet for aluminiumsproduksjon. Ved å utvida produktporteføljen på Husnes, vil vi vera betre rusta til å utnytta svingingane i marknaden, seier Hanne Simensen, konserndirektør i Hydro sitt forretningsområde Aluminium Metal.

Den automatiserte støypelinja vil ha ein årleg kapasitet på 100.000 tonn.

Forventa byggestart er i 2025, avhengig av endeleg byggevedtak. Ferdigstilling blir i fyrste kvartal 2026.

Framoverlente kundar

Lågare økonomisk aktivitet i Europa dei siste par åra har ført til produksjonskutt på Husnes. Tidlegare i 2024 annonserte Hydro avgjerda om å bruka dette moglegheitsvindauga strategisk til å fullføra teknologioppgraderinga av begge linjer, noko som vil gjera Husnes til eitt av dei mest moderne og energieffektive aluminiumsverka i verda.

– Etterspurnaden etter aluminiumsprodukt med lågt karbonfotavtrykk er forventa å auka i takt med strengare regulering og veksande bevisstheit blant forbrukarar om fotavtrykket til materiala vi omgir oss med. Husnes og dei fire andre aluminiumsverka våre i Norge står klare til å støtte nokre av dei mest framoverlente kundane i Europa i å nå klimamåla sine, seier Simensen i pressemeldinga.

700 kilo kvar

Hydro Husnes er eitt av Hydro sine fem heileigde aluminiumsverk på Vestlandet, med ein årleg kapasitet på 197.000 tonn primæraluminium. Aluminiumsblokkene frå det nye støyperiet skal lagast ved å hella flytande elektrolysemetall i store former i ein automatisert produksjonsprosess. Dei veg rundt 700 kilo kvar, og vert brukt som råmateriale til andre støyperiprodukt som pressbolt og valseblokk.