Elsa Søllesvik, aka Elsie Bay tok seg tid etter støttekonserten laurdag til å skriva autografar og ta bilete med fansa sine. Dette var til stor glede for mange små.

Elsie Bay-fans fekk autograf og bilete - sjå video og høyr den nye låta til MGP-stjerna

Det var både store og små i salen under støttekonserten for Ukraina i Kulturhuset Husnes laurdag. Då konserten var slutt var det mogleg å få autograf og bilete med Elsie Bay, noko som var til stor glede for mange.

Marthe Eide
Publisert Sist oppdatert

Kvinnheringen Elsa Søllesvik starta solokarrieren sin i samband med at ho deltok i den norske Melodi Grand Prix-finalen i mars. Laurdag kom ho til Husnes for å opptre under støttekonserten «Ei hjelpande hand for Ukraina». Artisten var ikkje i tvil om kva ho skulle svara då ho vart spurt om å delta.

– Eg, som mange andre, har tenkt på kva eg kan bidra med for å hjelpe. Då eg vart spurt om å delta under støttekonserten var det ei enkel avgjersle. Eg synest det er svært kjekt å få støtta ei viktig sak som dette. I tillegg fekk eg no moglegheit til å gi noko tilbake til dei mange kvinnheringane som støtta meg under MGP-finalen, seier Elsa Søllesvik aka Elsie Bay.

Elsa Søllesvik var svært takksam for at ho fekk vise si støtte med å delta i støttekonserten i sin eigen heimkommune laurdag. I tillegg fekk ho gi noko tilbake til dei som støtta ho under MGP-finalen.

Spente og glade fans

Då konserten var over kom MGP-stjerna ut i salen for å helsa på fansa sine. Mange smilande og spente barn samla seg rundt artisten for å få både autograf og bilete med Elsie Bay. I den lange køen var det mange små som stod å trippa å gledde seg til det var sin tur.

– Eg heia på Elsie Bay under MGP-finalen. Ho er kjempe flink, smiler Tilde Marie Ølfarnes som fekk autograf frå favorittartisten på den heilt nye veska si.

Mange samla seg rundt Elsie Bay for å få autograf og bilete.
Tilde Marie Ølfarnes viser stolt fram signaturen frå Elsie Bay på den nye veska si.

Elsa Søllesvik, med Lasse Nymann på keyboard, framførte tre låtar under støttekonserten i Kulturhuset Husnes. Først ut var låta «Young and Beautiful» som stammar frå karrieren til Elsa & Emilie.

Deretter framførte ho ei heilt ny låt for første gong, kalla «Bikinisong», til stor jubel for publikum. Til slutt fekk publikum sjølvsagt høyra MGP-låta «Death Of Us», som var ein førehandsfavoritt og som hamna blant topp fire i songprogrammet.

Elsa Søllesvik framførte tre nummer, deriblant ei ny rørande låt, førebels kalla «Bikinisong».
Støttekonsert: Elsa Søllesvik var takksam for at ho fekk vera med på konserten. Her gir ho ein applaus til Lasse Nymann på keyboard.

Sjå video og høyr Elsie Bay framføra den nye låta «Bikinisong».

kultur og underhaldning kjendisar husnes fritid nyhende musikk kuriosa og kjendisar
Powered by Labrador CMS