Elevane opptatte av skuleframtida

Onsdag 14. april vart administrasjonen si innstilling for framtidig skulestruktur presentert. Ordførar Hans Inge Myrvold har den siste tida, i forkant av planen, vore rundt på fleire skular og treft både elevar og vaksne på skulane.

– Rådhuset er stengt for tida, så eg har nytta høvet til å koma meg ut litt. Det har vore kjekt og nyttig å både sjå og høyra kva ein opptekne av ved dei ulike skulane.

På skulen i Sunndal spurde elevane om både storting og lokalpolitikk, men mest var dei opptekne av framtida til skulen.

– Det var ein reflektert gjeng som stilte gode spørsmål. Korleis det blir med skulen framover, skal ingen vera i tvil om at elevane bryr seg svært mykje om, seier Myrvold etter at han hadde brukt ein liten halvtime med elevane frå 5. til 7. trinn ved den todelte skulen lengst nord i kommunen.