Elevane leika «Kompani Lauritzen»
Elevane ved Skarveland skule har hatt «Kompani Lauritzen-veke», og avsluttar skuleveka i den nye hinderløypa til Kvinnherad vidaregåande skule.
Det var lærar Aina Elise Hus sin idé, og dermed vart ho organisator for denne kjekke og lærerike veka før sommarferien.
– Eg ynskte å laga til ei gøy veke for elevane, at vi skulle gjera noko annleis enn vi pleier, seier Hus.
Annonse
Flaggstress
Denne veka har elevane hatt vanleg skule dei to fyste timane. Resten av skuledagen har gått med til varierte aktivitetar. Alle elevane ved skulen blei fordelte i aldersblanda grupper som rullerte på tre hovudaktivitetar. Elevane skulle innom orientering, fyrstehjelp og noko dei kalla Flaggstress, som inneber rappellering og sjakk, å læra koordinatorsystemet og ulike strategispel, der somme er inspirera av Kompani Lauritzen.
– I tillegg til kjekke aktivitetar ynskte eg at veka òg skulle vera lærerik. Aktivitetane dekkjer fleire av kompetansemåla som elevane skal nå gjennom skuleåret, fortel Hus entusiastisk.
Rektor Anne-Grethe Kjærstad Berge er tydeleg ein nær rektor der ho går rundt i gangane og bidreg i kulissane.
Annonse
– Det er kjekt med kreative lærarar som ynsker å bidra for både elevar og kollegaer, seier ho smilande.
Hjarte- og lungeredning
Elevane Mari B. Holmedal, Inga Saghaug og Ernst Skarveland skulle torsdag få prøva seg i orientering.
– Dette er ei veldig kjekk veke, og vi har lært mykje om blant anna stabilt sideleie og hjarte- og lungeredning, seier elevane.
David Holmedal har lært rappellering som ein nyttar ved klatring , og saman med lærar Atie Skarveland viser han ivrig dei nye dugleikane.
– Det er fyste gong eg prøvar dette. Det er gøy, men mykje å halda styr på, seie Holmedal nøgd.
Annonse
Under denne aktiviteten har elevane gått i saman to og to, og hatt ansvaret for å hjelpe kvarandre med utstyret, samt utføra kameratsjekk.
– Dei har vore veldig konsentrerte og tatt sikkerheita på alvor. Det er kjekt å sjå at elevar går ut av si eiga komfortsone, og å sjå korleis dei veks på å gjera noko som kan vera skremmande. Ein ser at dei er stolte etterpå, og at dei har opplevd meistring, noko som er det viktigaste, seier Skarveland engasjert.
