Elektrisk surfing med Rosendal Aktiv

Det var mykje utstyr å halde styr på. Våtdrakter, tryggleiksutstyr, omkledingsrom og tre elektriske surfebrett som både skulle bli frakta og klårgjort.

– Me hadde håpa på å kunna driva «Rosendal Aktiv» frå bustaden i Neslia, men det fekk me ikkje løyve til. Eg tok meg ein tur ned til «Bar-On» og hadde ein samtale med eigar Anders Gaute Kristensen, og var heldig og fekk lovnad om å starta opp med efoil-tilbodet her, sa Brian nøgd.

Eit aktivt par

Baumann driv «Rosendal Aktiv» saman med kona Stine Skåla Baumann ved sida av ein travel kvardag med både heiltidsjobbar og småbarnsliv. Dei flytta frå Sola til Kvinnherad i slutten av 2023, med ein draum om å kunne drive noko sjølv. Dei var heldige med sal av hus, og hadde dimed råd til å kjøpa utstyrsparken utan ekstra finansiering.

– Utan lån er vi meir frie og kan driva verksemda utan økonomisk press. Eg gir draumen fem år, og håpar på å kunna leva av detta i løpet av desse åra, sa Brian som til dagleg jobbar som røyrleggar ved Husnes Røyr.

Stine jobbar ved Omstun i Rosendal som miljøterapeut, mens sonen på fem år blir skulegut etter sommaren. Dei flytta grunna Stine si tilknyting til bygda, då familien hennar er frå Rosendal og ho har vore her mykje i løpet av oppveksten.

– Det er berre ein annan plass eg kunne ha budd enn på Sola, og det er Rosendal. Naturen her byr på store opplevingar, fortalde Brian, og legg til at bygda har teke vel imot han og familien.

Ulike aktivitetar

Dei har oppretta eit eige firma som fyst heitte «Skåla Event», men dei landa til slutt på namnet «Rosendal Aktiv», noko som vart naturleg då dei samarbeider med «Nordfjord Aktiv». I tillegg til kurs og utleige av elektriske surfebrett, leiger dei ut elektriske terrengsyklar og kajakkar. Dei har òg badstue heime i Neslia.

– Vi hadde plan om å selja pakkar med både sykling, kajakkturar og brettsegling, for så å avslutta med badstue. Det var kjedeleg at området der vi bur er utvikla særskild til bustad, men vi må berre omstilla oss, sa ein positiv Brian.

Lydlaus sveving

Etter å ha fått informasjon og instruksjonar på land, samt fått på våtdraktene og rett tryggleiksutstyr, vart Grenda og Anders Gaute med Brian utpå med kvart sitt brett.

– Eg må setja meg inn i kva eg anbefaler, sa ein vonfull Anders Gaute.

Bretta har batteri og ein liten motor som vert styrt av ein kontroll. På undersida er det festa venge og stamme som båe stabiliserer og gjer at brettet kan heva seg opptil 75 cm over vassoverflata. Ein øver fyrst sittande på kne, deretter på alle fire og til sist ståande. I alle fasane øver ein på å løfta og senka brettet ved å bruka kroppsvekta og eiga plassering på brettet.

Det er der utfordringa byrjar, når du er høgt over vatnet og skal surfa bortetter utan redsle og med god balanse. Det er ikkje vanskeleg å tru på at dette vert magisk når ein meistrar teknikken og ein får kjensla av å sveva lydlaust over vatnet.

Spente ungdommar

Etter ein god halvtime vert båe Grenda og bareigaren temmeleg slitne og nøgde, og sett kursen inn igjen mot land. Der vert det fleire som ynskte å prøva, mellom anna syskena Hedda Skjærven Aas og broren Thorvald, som på eiga hand har bygd sitt eige brett utan motor.

– Det laga eg sjølv av eit surfebrett, og mast og vinge vart laga av treverk som eg festa på undersida. No gler eg meg veldig til å prøva med motor, sa Thorvald optimistisk.

Syster Hedda hadde aldri prøvd før, men var ikkje vond å be der ho var klår til å hoppa ut i vatnet.

– Eg er veldig spent, sa Hedda med stjerner i augo.

Verdsrekord i Nordfjordeid

For å vera endå meir sikre på suksess satsar «Rosendal Aktiv» òg på sal av elektriske surfebrett, både nye og brukte.

– Eg utfører service og har eit lite lager med delar, fortalde Brian og sa at dette gjev ekstra tryggleik om ein ynskjer å kjøpa seg eit brett.

Det har vore god respons på kursa, og truleg er det ein fordel å vera synlege i sentrum. No håper dei på endå meir aktivitet, og gler seg til neste høgdepunkt.

– Vi skal til Nordfjordeid å prøva og slå verdsrekord med flest mogleg brett ute på sjøen samstundes. Dette vert arrangert saman med «Nordfjordeid Aktiv» 7. august, og vi gler oss veldig, smilte Brian.

Å sveva lydlaust over havoverflata vert anbefalt, og Thorvald og Hedda skrytte av ei utruleg kjekk oppleving.

Foto og video i starten av artikkelen er teke av Kaia Helvik Skjærven.