Elektrisk rekordår for lokal bilforhandlar: – Hevdar oss stort

– Vi har hatt nok ein «all time high», smiler Vegard Jegteberg, som har vore eigar av S. Rødsten Bilforretning sidan hausten 2023, og før det tilsett i bedrifta i ti år.

Opplysningsrådet for vegtrafikken (OFV) melder at det blei selt 128.691 nye personbilar i 2024. Noko som berre gir ein svak auke på 1,4 prosent frå året før.

Jegteberg og resten av gjengen som jobbar hos bilforhandlaren i Herøysund, har dermed lagt bak seg eit over snittet godt salsår.

Flest vel elektrisk

Den lokale bilforhandlaren har nemleg selt i alt 294 bilar i 2024. 82 av desse var nybilar, medan 212 var brukte. Tala gjeld både personbilar og varebilar (18).

Jegteberg trur dette er ny rekord i tal selde bilar i Kvinnherad, og rosar teamet sitt, som i dag tel omkring ti årsverk.

– Dette er mange bilar, og her er det mange flotte kollegaer som har vore i sving for å både klargjera, selja og reparera bilar gjennom heile året. Altså eit fantastisk samarbeid, rosar han.

Jegteberg fortel at dei selte fleire nybilar i 1. kvartal av 2024, samanlikna med kva dei gjorde året før.

– Vi hevdar oss stort med tanke på landsbasis, fortel den positive bilseljaren, som kan røpa at S. Rødsten Bilforretning hamnar høgt oppe på registreringslistene over flest selte nybilar i 2024.

– Av dei nye personbilane vi har selt, vil eg seia at om lag 90 prosent, om ikkje endå meir, har vore heilelektriske, seier Jegteberg.

På landsbasis var også 90 prosent av selte nybilar heilelektriske. Vestland var det leiande fylket, med 91,2 prosent.

Bruktbil meir populært

For Herøysund-bedrifta, som i hovudsak er merkevareforhandlar for Kia, Subaru og Fiat Professional, er også bruktbilmarknaden eit viktig område, og i 2024 såg dei at etterspurnaden auka. Jegteberg trur dette heng saman med renteauke og bilprisar som har stige som eit resultat av høgare avgifter.

Samstundes hadde den lokale bilforhandlaren også eit langt betre utval bruktbilar i 2024 enn året før. Både innbytebilar, men også bilar som dei har kjøpt inn. Nok ein faktor som Jegteberg peikar på.

– Dette spelar sjølvsagt også ei stor rolle. Det er kjekt å sjå at vi har gjort ting rett, og tatt gode val og vurderingar når det kjem til etterspurnaden på marknaden, seier Jegteberg, som anslåg at om lag 50 prosent av bruktbilane dei har selt har vore heilelektriske.

Lokale varebilar framleis fossile

Den elektriske biltrenden har derimot eit godt stykke igjen å gå når det kjem til varebilar.

– Her er prosent elbilar stikk motsett av kva vi ser på personbilar, seier Jegteberg.

Noko som også viser godt igjen i rapporten som Opplysningsrådet for veitrafikken (OFV) kom med førre veke. Den slår fast at på landsbasis var 29,6 prosent av nye varebilar elektriske, noko som er ein nedgang på 1,3 prosent frå året før.

– Det er vanskeleg å finna varebilar som treff alle behov som dei ulike bedriftene måtte ha. Då skal ein gjerne tenka på både nyttelast og hengjarlast. Skal lastekapasiteten opp, må vekta på batteriet ned, noko som går utover rekkevidda, seier Jegteberg.

Han trur at fleire bedrifter i kommunen vil velja grøne varebilar etterkvart som utvalet blir større og betre.

– Men framleis er det fossilt som vinn varebilmarknaden både nasjonalt og lokalt, legg bilseljaren til.

Positiv

Jegteberg ser elles svært optimistisk på det komande året, og peikar mellom anna på eit breiare utval som ein årsak til dette.

– Vi får fleire nye modellar i løpet av året, snik han inn.