Eldsjelene bak Toftåsen

– «Åsaskue» er ei slags dagsturhytte der folk kan sitja å kosa seg å nyta den flotte utsikta. Me har arbeida med den i vel eit år no, og me er svært nøgd med resultatet. No gjenstår berre småtteri som mellom anna panel på eine veggen på innsida, fortel eldsjela og styremedlem Svenn Erik Eide.

Eldsjelene i foreininga har ikkje planlagt noko offisiell opning av hytta, men Eide fortel at dette kan la seg gjera om folk ynskjer det.

– Me er i sluttspurten, så det er ikkje lengje til turfolk kan ta den i bruk. Om vêret blir betre enn slik det har vore den siste tida, og om folk ynskjer det, blir me jo lystne på å laga til ei opning, seier han.

Overnatting på Åsen

«Minihytta» ligg heilt på kanten på «Åsatinget« like ved Toftåstoppen, og utsikta kan ta pusten frå kvar og ein. Meldingar om overnatting har allereie begynt å renna inn i innboksen til arbeidskarane.

– Me har eigentleg ikkje lagt opp til noko overnatting i den, men me har allereie fått mange spørsmål kring det. Om folk ynskjer å overnatta kan me ikkje nekta dei, seier Eide.

Det er Svenn Erik Eide, Halldor Herland og Audun Tvedten som står bak bygginga av den moderne og sjarmerande hytta. Det har kosta, både økonomisk og fysisk.

– Me har vore tre frivillige som har arbeida på hytta denne hausten. Olav Hindøy har vore sjukmeldt sidan i vår, men no er han endeleg tilbake. Det har vore mykje jobb og hardt arbeid. All plank skal jo til topps, og samstundes er det jo ein jobb i seg sjølv å samla inn pengar. Vindaugene kostar mellom anna fleire tusen kroner, og materiale no til dags er ikkje akkurat billeg. Heldigvis er Halldor svært kreativ og nevenyttig, så han har mellom anna laga døra heime i kjellaren, fortel han.

Når det gjeld det økonomiske har foreininga fått midlar frå mellom anna Fjelberg kraftlag og Sparebankstiftinga.

– Me har fått hundrevis av tusen totalt sett på dei åra me har heldt på. Dette er me svært takksam for, då me er heilt avhengig av tilskota.

Dei arrangerer også basar, og her får dei inn bidrag frå både kjente og ukjente. I mai leverte dugnadsgjengen sjølv ein annleis og morosam hovudgevinst.

– Hovudgevinsten bestod av ein full middag med dessert på «Åsatinget», servert av oss frivillige. Det var ei dame frå Sveio som vann, og ho tok med seg to vennepar. Det vart ei koseleg stund med talar, gode historier og musikk.

Frispeegolf

Tross for alt arbeidet pensjonistkarane har fått til, anten om det er hytter, gapahuk, turstiar og bruer, treng dei likevel fleire frivillige med på laget.

– Me skulle gjerne hatt med oss fleire, unge som eldre. Eg er vel den einaste som ikkje har fylt 70 år av oss, då eg berre er 64, ler Eide og held fram:

– Aller helst skulle me fått med oss nokre ivrige unge på laget, for me ser at det blir ein del framtidig vedlikehald. I tillegg er det fleire som ynskjer ein frispeegolf bane i skogen, og det kan me absolutt få til, men då må folk koma å bidra. Om ein fyrst blir med får ein sitt kor kjekt og sosialt me har det, og då blir ein raskt bitt av basillen. Sjølv om det ofte er lange dagar med mykje arbeid finn me på mykje lott og løye. Ofte fyrar me i bålpanna og lagar oss ein betre middag, og i nokre høve slår me til med vin til maten.

Eide fortel at dei ofte møter på turgåarar mens dei held på i skogen. Det er mange gode tilbakemeldingar å få, og det er nettopp dette som er drivkrafta bak arbeidet.

– Me får mykje ros og skryt for arbeidet me legg ned, og det er fantastisk motiverande. Det er kjekt å sjå at turområdet blir mykje brukt, både av store og små. Mange riggar seg til med hengekøyer, og gapahuken ved «Åsatinget» har blitt ein koseleg møtestad.

Ettersom Toftåsen blir flittig brukt, har dette medført ei auke i trafikken i området. Her ynskjer Eide å koma med ei oppmoding.

– Sidan skogsområda ved Toftåsen har blitt svært populære, har dette medført ei auke i trafikk, både i Tofte-området og i private skogsvegar. Me vil difor koma med ei oppmoding om å gjerne parkera ved Tofte skule. Det er viktig å hugsa på at fleire barn leikar i området. Og ved å parkera ved skulen får ein i tillegg ein fin ekstra tur, fastslår Eide.

Brenn for det frivillige arbeidet

Føremålet med det frivillige arbeidet er at alle skal kunne ferdast trygt og godt, samstundes som det skal vera morosamt for dei små å vera med. Langs dei mange turstiane er det sett opp pynt av ulikt slag, mellom anna figurar av nissar, troll, revar og fuglar.

– Det blir difor ekstra spanande å ferdast i skogen, seier Eide

Det er tydeleg at dugnadsgjengen brenn for det frivillige arbeidet.

– Det gir oss sosialt samvær, noko som står øverst på lista på spørsmål om kvifor me orkar å leggja ned all den tida og kreftene. Eg er også førtidspensjonert, så det er godt å koma seg ut å vera saman med andre. Det er nok det som driv oss alle saman, og ikkje minst alle dei gode tilbakemeldingane frå turgåarar, sluttar han.