«Eld!»

Skytingas dag skal vera ein dag der Det frivillige Skyttervesen skal gjera seg synlege i lokalmiljøet. Dagen har vore arrangert sidan 1954 som ein årleg marknadsføring- og rekrutteringsdag i skyttarlaga.

Denne bladfyken møtte opp litt tidleg og før alle andre. Sidan det ikkje var så mykje anna å gjera fekk ho prøvd seg på litt skyting.

Fyrst inn for å ta på skytejakke og hanske, for så ut på 100-meteren for å læra om korleis handtera våpenet, om ein skal ha støtte eller reim, korleis ligga i skytestilling og korleis skyta.

Med siktet direkte på blink nr. 4 var det berre til å venta på ordet «eld» over høgttalaren. Etter nokre prøveskot fekk vi hjelp av dei erfarne skyttarane til å justera siktet og stilling om det trengst. Bladfyken fekk siktet stilt med to klikk.

Så var det klart for to ordentlege rundar, der dei talte poeng. Det gjekk tålig greitt for alle dei som prøvde seg i bladfyken si pulja.

32 stykke fekk skyta 15 skot kvar, og etterpå vart alle som deltok løna med diplom. Leiar i skyttarlaget Synneva Seim bydde på vaflar, saft og kaffi i sola.