Ekte julestemning i Rosendal
Tradisjonen tru har dei mange små kunstnarane frå Rosendal og Omvikdalen sørga for at det vart juleutstilling på varehuset i Rosendal også i år.
Nedst i trappa stod det mange spente og glade born og venta. Både Rosendal FUS barnehage og fyrsteklasse ved Malmanger skule hadde teke turen for å bli med på den høgtidlege opninga av utstillinga som dei sjølve har vore med på å laga til.
Men før dei kunne gå opp og sjå, måtte songar syngast og snora klippast. Klassekameratane ved Rosendal barnehage gledde alle frammøtte med å synga både «Vennesongen» og «På loven sitter nissen». Oda Sofie vart den heldige utvalde etter ellemetoden og fekk koma fram for å styra saksa, og på 1, 2, 3 vart utstillinga offisielt opna.
Annonse
Virvar
– Denne utstillinga vert sett opp på vegner av Jul i Rosendal, og det er alle ungane i Rosendal FUS barnhage, Malmanger skule, Omvikdalen barnehage og skule, samt 10.-klassingane ved Rosendal ungdomsskule som har vore med. Dei fekk «juletradisjonar» som tema, og har laga ulike ting ut i frå det, forklarte Mette Friheim som er Jul i Rosendal sin utsende representant.
Skulekamerat Hennie Aurora hadde teke med seg bestemora si for å syna fram tinga ho hadde laga, men det var ikkje så enkelt å finna fram i alt virvaret.
– Eg veit ikkje heilt kva for ein eg har laga, me prøver å leita, sa Hennie Aurora.
Annonse
– Det er litt vanskeleg å finna fram blant alle folka, la bestemor til.
Også fyrsteklasse frå Malmanger skule var til stades for å få med seg hendinga.
– Det er stor stas for borna å få vera med på dette, og ikkje minst det å få ta med seg foreldre, besteforeldre, tanter og onklar og syna fram alt dei har laga. Det har etter kvart blitt ein lang tradisjon, til og med under koronaen hadde me denne utstillinga, fortalde lærar for fyrsteklasse Annbjørg Fossberg.
