Ekstrapott til sju butikkar
I budsjettet vart det øyremerka ein ekstrapott til dei såkalla Merkur-butikkane.
Publisert
Sist oppdatert
I det vedtekne budsjettet vert det slege fast at dei minste daglegvarebutikkane i dei minste lokalsamfunna i kommunen er viktige møteplassar for innbyggjarane. Kvinnherad har seks daglegvarebutikkar og éin bokhandel som er med i det statlege distriktspolitiske verkemiddelet Merkur-programmet.
«Desse butikkane yter uformelle tilleggstenester overfor faste kundar og fastbuande, og folk som besøkjer bygda. Døme på dette er gjestetoalett, turistinformasjon, bokkasse for Biblioteket, dei hjelper sambygdingane med IT-utfordringar, har kaffikrok, ryddar og vedlikeheld offentlege fellesområde og så vidare», står det.
Annonse
Handterbare
No ynskjer ein at kommunen skal bidra til betre vilkår for butikkane, blant anna ved å utvikla og formalisera nærbutikkane sine funksjonar på vegner av kommunen.
«Dersom kommunen skal gå vidare med dette, er det viktig at avtalane har eit konkret innhald, at oppgåvene som butikkane skal gjera er handterbare, og at betalinga er rimeleg i forhold til tenesta som kommunen kjøper», heiter det.
Det vert sett av 100.000 kroner årleg til slike serviceavtalar med desse butikkane.
Annonse
– Vi er glade for at koalisjonen no tek inn Merkur-butikkane, som er ei viktig sak for oss i Senterpartiet, kommenterte ei nøgd Veronica Thorkildsen Thorsen.
