Ekstraordinær løyving kjem personar med rus- og psykiske helseproblem til gode

I juni vart det søkt om tilskot til ein 100 % stilling som aktivitør i 6 månadar, samt ein pott på 25.000 kroner til aktivitetar og transport. Søkjesummen på 400.000 kroner vart innvilga i sin heilskap, og skal etter vilkåra brukast innan utgangen av året.

«Dette er ei ekstraordinær løyving som skal hjelpe i ein mellombels situasjon,» står det å lesa i tilskotsbrevet, kor det også kjem fram at midlane skal gå til aktivitet som raskt vil koma brukarane til gode.

Mange nye brukarar og auka einsemd blant utfordringane

Utfordringsbiletet for målgruppa i Kvinnherad vert skissert ved at det har det vore stor pågang av nye brukarar inn i tenesta, mange av brukarane har opplevd forverring av sjukdomsbilete, auka grad av einsemd og kjent på mangel av sosialt fellesskap. Alle desse faktorane har bidrege til at brukarane har opplevd dårlegare psykisk helse.

– Sjølv om me har halde ope aktivitetstilboda våre gjennom pandemien, har det vore avgrensa kor mange som har kunna delta på aktivitetane grunna smitteverntiltak. Dei ekstra kjekke aktivitetane, som å reise på bowling eller grilla, er det nok mange som no ønskjer, fortel Linn Stene Hellås, einingsleiar ved Rus og psykiske helsetenester.

Ho legg til at dei med dette tilskotet får frigjort ressursar, slik at det kan bli eit auka og meir tilrettelagt aktivitetstilbod for brukarane. Det vert større rom for meir ein-til-ein oppfølging, til å skipa i stand fleire aktivitetar i mindre grupper. Likeins vert det mogleg å styrka bemanninga ved Fatland aktivitetshus og dei kommunale bufellesskapa enkelte dagar.

Vil skapa gode timar for brukarane

Tonje Gravdal, som fram til august har vikariert som aktivitør i 50 % stilling ved Bufellesskapet S15, har no takka ja til å auke si stilling til 100 %. Gravdal skal såleis bidra til å imøtekoma tiltaka som er skissert i søknaden: å tilby individuell oppfølging og opprette små grupper der fleire kan delta, for slik å skape sosiale fellesskap.

Aktivitet ved fjord og fjell, treningsgrupper, heimebesøk, bilturar, samt oppfølging av aktivitet i bufellesskapa og til heimebuande vert i søknaden nemnd som nokre av tiltaka. Gravdal stadfestar at tilbodet vil vera variert, og ho påpeikar vidare at det skal vera eit fleksibelt lågterskeltilbod.

– Dette blir kjempepositivt for brukarane der kvar av dei vil få meir tid, og ein vil rett og slett få til meir med midlane som no er løyvd. Vi gjer ting som kvar enkelt er interessert i. For nokon vil det vera å gå på tur, andre likar å gå på kafé, medan nokre kanskje helst vil ha besøk heime. Poenget er at dei får nokre gode timar, fortel Gravdal.

Sponsa av treningsstudio

Enkelte brukarar har ho med seg i atelier, Ungdomssenteret på Husnes vert mykje nytta til ulike aktivitetar på dagtid, og ho har dessutan fleire med seg på trening på Sky Fitness.

– Sky Fitness har faktisk sponsa oss med eit års medlemsskap som brukarane får nytta på deling, informerer ho, og legg til at dette er eit supert tilbod som gjer det økonomisk mogleg for fleire i målgruppa deira å trena på treningsstudio.

Ørjan Johansen tykkjer det er fint å kunne bidra med eit medlemskap, og viser til forsking som viser kor viktig trening er, både for fysisk og psykisk helse. Trening er mellom anna ein arena der der er lett å oppnå meistringskjensle, noko som er med å påverka alle positivt.

– Det er kjekt å kunna gi litt tilbake til samfunnet, slår han fast.