Eit frø vil spira

Pernille Bjørgen Eskeland var nok den yngste som var med på såkurs. Ho er på vinterferie hos bestemor Irene Bjørgen på Halsnøy og dei ville finna på noko kjekt.

– Vi vart tipsa om dette kurset og bestemte oss for å ta turen. Kjekt med litt andre ting enn å berre sitja inne, fortalde Irene medan Pernille fekk prøva seg på å planta paprika i avispapirkrukker.

Hilde Blokkum, som er styremedlem i Kvinnherad Hagelag lærte dei frammøtte om kva som var riktig tid å så frø, og korleis ein skal gjera det.

– Det er jo litt forskjell utifrå kva ein skal planta, men det står som regel på posen kva tid ein skal setje frøa i jorda, og kor langt nedi jorda ein må setje dei, fortalde ho, og la til;

– Hugs at eit frø vil spira. Så om ein planter det og passar på kjem det mest sannsynlig fram.

Hilde lærte dei frammøtte korleis ein kan så frø utan å bruka ein haug med pengar. Mellom anna gamle aviser, brukte druekartongar og dopapirrullar var til god hjelp.

– Det treng ikkje bli dyrt, og ein treng ikkje all verda. Eg brukar forkle fordi eller tørkar eg hendene på buksene. Men eg brukar ikkje hanskar, fordi eg meiner alle har godt av å stikka hendene i jorda, smilte ho.

Ei stor interesse

Som utdanna landskapsarkitekt skulle ein tru Hilde hadde fått nok av blomar. Ho fortel at det er heilt motsett.

– Eg vart landskapsarkitekt fordi eg var så interessert i hage og blomar og natur, og så har eg alltid likt teikning. Eg fann ei utdanning som kombinerte interessene og har jobba som det i 18 år, fortalde ho.

I jobben går det mest i store anlegg, så når sjansen baud seg til å ta fått på ein eigen hage, var ikkje Hilde sein å be.

– Eg hadde litegrann planter der eg budde i Stavanger, men eg flytta heim til Kvinnherad for fem år sidan slik at eg kunne få meg ein ordentleg hage å stella med. Det var då det tok fart, fortalde ho.

I tillegg til 9-4-jobben sin, hagen, Instagram og blogg, vil Hilde prøva å tilby litt hagedesign for dei som er interesserte i det.