Eirik frå Fureberg leiar Operasjon Dagsverk på landsplan

Eirik Pederson Fureberg frå Fureberg har sidan i summar jobba frivillig på fulltid i Oslo med å arrangera Operasjon Dagsverk (OD) på nasjonalt nivå.

OD organiserer rundt 3000 frivillige på landsbasis i hele Noreg. Eirik er ein av elleve ungdommar som sit i ODs hovudkomité i Oslo og leiar aksjonen, skriv Operasjon Dagsverk i ei pressemelding.

– Verda er urettferdig, og eg vil endra det. OD og hovudkomiteen er den beste måten for meg til å gjere verda ein litt betre plass, seier Eirik i pressemeldinga.

Årets OD-kampanje skal støtte flyktningar på flukt frå Sør-Sudan i nordlege Uganda. Over ein million menneske har flykta frå krigen i Sør-Sudan. Mange har opplevd drap, mishandling og valdtekt. Prosjektet skal støtta 10.200 ungdommar med traumebehandling, fred- og forsoningsarbeid, og utdanning.

– Det er ein god del som tykkjer at ein flyktning berre er ein flyktning, men om ein gjer det så klarer ein ikkje å sjå alt det potensialet, alt håpet og alle draumane dei har. Det er alt for lett å tenkja at dette ikkje angår oss, men me kjenner alle nokon som har vore på flukt, og me har eit grunnleggjande ansvar for å ta vare på kvarandre, uansett kven dei er. Det handlar ikkje om hudfarge eller nasjonalitet, det handlar om at me alle er i same båt, og me har ansvar for kvarandre, seier Fureberg.

Årets OD-dag finner stad 29. oktober, og internasjonal veke skjer 12. – 23. oktober.