Einebustad totalskadd: - Veldig vanskeleg å sløkka

Kl. 05:22 vart AMK oppringt av ein nabo som observerte brann i ein einebustad i Botnavegen på Kaldestad. Samtlege naudetatar rykte ut, og brannmannskapet var tidleg i gang med sløkkingsarbeid.

Dei fekk først opplyst feil husnummer, og trudde det skulle vera seks personar registrert på adressa, men det viste seg at huset det var snakk om berre har éin bebuar. Denne er gjort reie for, og var ikkje heime då brannen starta. Det skal ikkje vera andre i bustaden.

Det vart meldt om store flammar, og politiet skreiv klokka 05:56 at bustaden var overtent. Det er vindstille, og ikkje fare for spreiing av brannen. Brannmannskapet veit førebels ikkje kor eller korleis brannen skal ha starta.

– Vi har ikkje heilt kontroll på sjølve brannen. Vi har fått «slått det ned» og vi har fått avgrensa det, men det er eit eldre hus som er påbygd, så vi slit litt med at det er mange hòlrom der brannen sit. Dermed er det mange forskjellige ting vi må tenka på. Brannen kan spreia seg, for det er eit gamalt tømmerhus. Når det fyrst har teke tak, då er det veldig vanskeleg å få sløkka, sa vakthavande for Kvinnherad brann og redning, Thomas Hallqvist til Grenda i 8-tida.

Motorsag

Han hadde då ikkje sendt brannfolk inn i huset enno.

– Eg vil ikkje senda folk inn på grunn av situasjonen slik den er, så vi må konsentrera oss om å ta dette frå utsida, forklarte han.

Då Grenda var på staden høyrtest lyden av motorsag.

– Vi bruker motorsag for å koma til i etasjeskiljet. Årsaka er at vi finn stader der det er varmt, og då må vi prøva å opna og for å koma til.

– Og det er heldigvis ikkje folk i huset?

– Nei, etter det vi har informasjon om er det korkje folk eller dyr inne, avslutta Thomas Hallqvist.

Spreia seg

Politioverbetjent Torgeir Fosse stadfestar at det var ein nabo som var tidleg oppe som oppdaga brannen. Allereie då var det opne flammar inne i huset. Naudetatane og andre naboar vart varsla. Bebuaren i huset var på arbeid, så det var heldigvis ingen heime der.

– Naudetatane rykte ut, men då var brannen kome så langt at huset var overtent. Det brann såpass at ein var litt uroleg for at flammane kunne spreia seg til nabohusa. Det var dessutan tungt å sløkka. Brannen er no sløkt, men brannvernet blir på staden nokre timar utover dagen, for å passa på at det ikkje blussar opp igjen, sa Fosse i 10-tida.

Han la til at huset er å rekna som totalskadd, og at brannen vil bli etterforska på vanleg måte.