– Ein tenkjer jo ikkje at folk er så utspekulerte
Natt til sundag førre helg vakna Wenche Aakre frå Herøysund av eit mareritt, berre for å oppdaga noko urovekkande borte hjå naboen.
– Eg var uroleg etter marerittet og gjekk inn i stova. Der ser eg tilfeldigvis bort til naboen at det er lys i garasjen. Umiddelbart tenkte eg at det var eit slikt automatisk lys som kom på, men også at det var veldig rart at dei dreiv og styrte på der ute klokka 04 om natta, fortel Wenche Aakre.
– Eg tenkte at dette må eg undersøkje, og då eg kika ut soveromsglaset såg eg ein mann som gjekk forbi med hettegensar med hetta godt trekt nedover hovudet og hendene i lommene. Han gjekk fort og ganske målbevisst, forklarer Aakre.
Annonse
Meir utrygg
Naboen til Wenche er også søstera hennar, Gro Aakre, som kunne fortelje at det automatiske lyset var og er kopla frå, og dermed ikkje kunne ha slått seg på. Søstrene konkluderer då med at innbrotstjuven må ha hatt med seg ei lommelykt av noko slag.
– Korleis har dette påverka dykk i etterkant?
– Det er klart at det er ekkelt, og ein føler seg jo meir utrygg. Før var me nok litt slauren på å låsa og slikt, men no låser me alt. Eg må også innrømme at eg sette hjarte litt i halsen i går kveld, då hunden plutseleg byrja å bjeffa noko veldig. Då kjende eg det, men eg gjekk og sjekka likevel, seier Gro Aakre.
Annonse
– Ein tenkjer jo ikkje at folk er så utspekulerte og at slikt kan skje her ute på bygda. Men det gjer det jo altså, og det er forferdeleg at me er komne dit henn, legg Wenche Aakre til.
Politiet
Dagen etter hendinga ringde dei til politiet og melde det, trass i at ingenting ser ut til å ha vorte teke.
– Me ville få det registrert, litt fordi eg ikkje visste om det var noko som føregjekk eller om politiet visste noko meir. Det gjorde dei ikkje, så me kan jo berre håpa på at det var tilfeldigheiter, seier Gro.
I etterkant av hendinga har dei to søstrene informert alle naboane sine og bede dei om å passa ekstra godt på tinga sine, og oppmodar andre til å gjera det same.
– Alt av verdi eller alt ein er redd for må sikrast når slikt til og med kan skje her i grisgrendte strøk ute på bygda, seier Gro Aakre.
