– Ein tenkjer gjerne at dette skjer ikkje hos oss

Einingsleiar Lilli Britt Urheim har på vegne av skulen takka ja til å bli med på pilot-prosjektet som barneverntenesta i Kvinnherad og Ullensvang i desse dagar rullar ut.

Ho stadfestar at skulen historisk sett har hatt lite merksemd på problematikken, og no ynskjer dei å auke kompetansen både blant tilsette og elevar.

– Ein høyrer til dømes om nettovergrep og sovevaldtekter, og det er denne røynda ungdommane våre står i i dag. Å rusta dei til å setja grenser for seg sjølv, det er me berre plukka nøydd til, seier Urheim alvorleg.

Ho legg til at seksuelle overgrep og vald er eit ubehageleg tema for alle, og at det difor er godt å få rettleiing og oppfølging gjennom pilotprosjektet.

Set i gong pilotprosjekt innan vald og overgrep mot barn

Må vera føre var

Dei tilsette har hatt fleire besøk av leiaren og koordinatoren av prosjektet, Kurt Helge Dahl, og dei ser fram til å få eit meir kontinuerleg fokus på utfordringane. Dette får dei ved å følgje årshjulet i opplegget, der det er lagt opp til fagdagar og veker kor vald og overgrep blir sett på planen.

– Me er ei lita eining, og har liten erfaring med å stå i slike saker. Ved å delta i dette prosjektet vil me vonleg kunne opptre meir profesjonelt og vite korleis me skal gå fram når ein først kjem oppi ein slik sak. Det er lett å gå i ei boble og sei at «dette skjer ikkje hos oss», men her må me vera føre var, slår Urheim fast.

Då livsmeistring er eit overordna område i læreplanen, vil eit fast og konkret fokus på kompetanseheving innan vald og overgrep falla inn under det skulen allereie skal jobba med. Fokuset vil dessutan inngå naturleg i fleire av skulefaga, som Krle og samfunnsfag.

Elevane kan mellom anna venta seg ei årleg fokusveke på vinteren, der kropp, grensesetjing og andre aktuelle tema får ekstra merksemd.

– Med dette forpliktar me oss til å jobba med tematikken på ein kontinuerleg og heilskapleg måte. Og når ein legg eit grunnlaget gjennom ei årleg fokusveke, kor alle får den same undervisninga, blir det lettare å byggje vidare på det fundamentet med dryp elles i året òg, meinar Urheim.

Inspektøren skal følga opp

På Hatlestrand skule er det inspektøren som no går inn i rolla som barnas verneombod, og som såleis skal delta på fagdagar, vidareformidla kunnskapen som blir tileigna på desse, og som skal sjå til at skulen føl opp årshjulet.

– Men det er ikkje berre dei tilsette som har behov for meir kunnskap om temaet, det gjer jo ungane òg. Om ein ven er utsett for noko slikt, skal ungane vita korleis dei går fram og kven dei kan snakka med. Det handlar også om venskap, og om korleis ein er med kvarandre.

Urheim meiner at undervisningsopplegget dei no skal ta i bruk er godt tilpassa til dei ulike alderstrinna.

– Den førebyggjande biten er ufatteleg viktig, sluttar ho.