Ein særs spanande opningskonsert

Leif Ove Andsnes tok fyrst til orde for å ynskja eit spent publikum velkomen, men sette nok eit nervøst støkk i dei fleste då han vedkjente at mange hadde slite med å koma fram til festivalen i tide grunna eit visst uvêr ved namn «Hans».

– Eg kan med glede fortelje at alle musikarar er her, og med tanke på vêret passer det jo ekstra bra at det nettopp er Brahms sin Regnsonate som opnar årets festival, fortel Andsnes vidare til eit letta og humrande publikum før han gav ordet vidare til Åse Kleveland som hadde fått det ærefulle oppdraget med å opna festivalen.

Stor takk

Kleveland starta med å undra seg over det fantastiske rommet me alle oppheldt oss i, samtidig som ho beundra dei nydelege rammene kring festivalen, nemleg Baroniet.

– Korleis kunne dei putte dette slottet her, så langt vekke? Men me er her for å lytta og snakka om musikk. Det har vore mange store artistar som har kome hit gjennom tidene, som har brukt tid her, budd her, jobba og lagt seg seint, seier Kleveland og måler med det eit levande bilete av dei djupe musikalske røtene til denne historiske staden.

Vidare skrytte ho av verten for kvelden, nemleg Leif Ove Andsnes.

– På sitt vis er han så mykje meir enn ein musikar, og han har vore ein trufast og kreativ ven av denne staden i mange år, seier ho vidare.

Til slutt takka ho Anne Grete Honerød og Reidar Nedrebø ettertrykkeleg for alt dei har gjort, til stor applaus frå heile salen. Honerød og Nedrebø er som kjend i ferd med å tre av som direktørar for Baroniet, og har overlate roret til Anna Lena Flatland.

Etter det kunne årets Kammermusikkfestival i Rosendal offisielt opnast, og publikum kunne lena seg tilbake og nyta.

Leikande

Fyrst ut var Johannes Bramhs sin Regnsonate, Fiolinsonate nr 1 i G-dur prakfullt framført av James Ehnes på fiolin saman med Yeol-Eum Son på piano.

Nestemann ut, og sist før pausen, var ei feiring av György Ligeti med «Det makabres mysterier» som også må seiast å vera ei sann feiring av det leikande og sære framført på spektakulært vis av Håkan Hardenberger på trompet og Roland Pöntinen på piano. Hardenberger og Pöntinen lokka fram latteren hjå mange meir enn éin gong i løpet av stykket, og synte at sjølv på ei scene som kammermusikkfestivalen innehar kan det dukka opp både uventa og overraskande ting.

Til å avslutta denne fyrste kvelden på Rosendal Kammermusikkfestival 2023 var Andsnes sjølv på piano saman med den imponerande strykekvartetten The Dover Quartet. Dei skapa inkje mindre enn magi gjennom Johannes Brahms sin Pianokvintett i f-moll, noko tilskodarane visste å setja pris på ved vegs ende med stormande applaus og trampeklapp.