Ein halv million i støtte til dokumentarserie

Anders Kråkevik kjem frå Hardanger, men er for tida busett i Uskedalen. Verksemda hans Voss Media er registrert i Haugesund, noko som gjer dette prosjektet eigna for støtte frå Filmkraft.

Filmkraft er nemleg eit regionalt filmsenter som jobbar for å utvikla og styrka profesjonell audiovisuell produksjon i Rogaland, noko dei gjer gjennom å løyva tilskot til utvikling og produksjon av dokumentar- og fiksjonsfilm og spelutvikling.

Samanlagt vart det søkt om 7.848.540 kroner i denne runden, og løyvingane vart gjort kjend 1. juni.

Sameaspiranten

Kråkevik er tidvis å sjå med propell på ryggen, hengande frå ein paraglider. Film- og fotokamera er heller ikkje langt unna når eventyraren – og no serieskaparen – er på tur.

Då han (for første gong) skulle fyka Norge på langs med denne utstyrspakka enda han opp i Kautokeino, kor han møtte Mathis. Det er dette møtet som blir formidla i dokumentarserien som no har fått tilskot frå Filmkraft.

I prosjektbeskrivinga til Sameaspiranten blir dokumentarserien omtala på følgjande vis:

Då den paraglider-fykande eplebonden Anders Kråkevik frå Hardanger bestemmer seg for å fly Norge på langs, anar han ikkje kva som ventar: På Finnmarksvidda møter han reindriftssamen Mathis Oskal, og dette tilfeldige møtet fører til at den planlagde reisa frå nord til sør brått får ein ny kurs. Mathis inviterer nemleg den eventyrlystne eplebonden til å følgja han og resten av flokken gjennom eit heilt år på vidda. Gjennom fire årstider er det duka for eit dramatisk og fascinerande eventyr - og det veks fram eit unikt vennskap mellom reindriftssamen Mathis og sameaspiranten Anders.

Sendeklar i november

Heime i Uskedalen kan Anders fortelja at produksjonen er i full gong.

– Det er laga fire grov-episodar, som skal klippast ned til tre. Ifølgje framdriftsplanen skal serien vera sendeklar i november. Vi er i forhandlingar med ein tv-kanal i desse dagar, og med pengane frå Filmkraft er prosjektet over halvfinansiert. Det er komplekse greier, men med dette blir det iallfall noko av. Det er ganske sjukt, smiler den lukkelege serieskaparen.

– Jækla godt team

Anders Kråkevik har sjølv regien på «Sameaspiranten», men han har fått med seg eit godt team til å utvikla serien og alt rundt. Kristian Landmark har laga manus og Tor Kristian Liseth er produsent. Det er Voss Media AS som står som søkjar, ei verksemd drive av Kråkevik, men som har fleire medarbeidarar som òg er med på å dra prosjektet i hamn.

– No skal eg til Kristiansand for å spela inn forteljarstemme, så tar eg turen til Oslo, kor ein av klipparane er. Det er ein klippar i Stavanger, så det er litt av eit samansurium! I tillegg kjem lyddesign, grading, animasjonar og grafikk som skal leggast inn. Men eg har jo valt kven eg vil jobba med, og det er altså eit jækla godt team, slår han fast.

Sjølv om det ligg eit solid lagarbeid bak serien, har det vore mykje nytt for Kråkevik å setja seg inn i. Han viser fram dokumentmappene på pc-skjermen som er fulle med kontraktar, opsjonar, prosjektskildringar, budsjett, framdriftsplanar, med meir.

– Det har vore frykteleg mykje å setja seg inn i for meg som ikkje har peiling på dette. Eg har iallfall brukt to år på å få alt på plass med søknadane, seier Kråkevik.

Klar for luftig eventyr

Stor utfordring

Det er seks år sidan han først sa at han skulle laga serie, og når han tenkjer attende til den tida ler han høgt.

– Dette er den aller største utfordringa eg har hatt. Det har vore mykje usikkerheit, motstand og komplekse greier å setja seg inn i. Men jo meir kaos eg har rundt meg, jo rolegare blir eg. Så eg elskar jo slikt! Elles hadde eg ikkje haldt ut, medgir han.

Dei neste månadane skal altså fire episodar klippast ned til tre og finpussast. Kvar av episodane skal vera på 45 minutt, og det er såleis mange val som må gjerast før serien er sendeklar.

Samstundes som «Sameaspiranten» tek form blir det også jobba i kulissane, mellom med andre filmprosjekt i same sjanger men med ulik tematikk.

– Planen vidare er å lage ein teaser på engelsk. Om vi lagar ein engelsk versjon er mogleg Netflix interessert. Elles er vi i dialog med både svensk og dansk tv, som er veldig interessert. Det blir iallfall full fart no når desse pengane kom, sluttar serieskaparen nøgd.