Ein god straum til bruktmarknaden
Laurdag denne helga skipa Ungdomslaget Hatlestrendingen til bruktmarknad i ungdomshuset på Hatlestrand, til stor glede for mange.
Med vel 20 seljarar som hadde kvar sitt bord og bra med folk, var det fullt i salen på ungdomshuset, i fylgje styremedlem i ungdomslaget Mariann Svåsand.
– Det gjekk veldig fint, og det var ein god del folk som kom innom. Eg har ikkje oversikt over akkurat kor mange, men det var ein jamn straum med folk heile dagen. Det var også mange som sette seg i kafeen og koste seg med ein kopp kaffi, fortalde Svåsand.
Annonse
– Me visste jo ikkje på førehand kva folk hadde med seg, men dei fleste seljarane hadde med klede, men det var nokre som også hadde med ting. Neste gong, dersom det er på våren eller sommaren, kan me kanskje ha det ute slik at folk også kan ha med seg til dømes syklar eller ski og den type ting, fortsette ho.
– Så det blir ei neste gong?
– Ja, dette var veldig kjekt, og me vil gjerne gjenta dette ein annan gong. Me har jo ikkje så store bygdene her borte, men det var mange som kom innom og som hadde sett av dagen til å vera der. Me fekk mange kjekke og positive tilbakemeldingar. Folk tykte det var kjekt at noko skjedde i ungdomshuset på dagtid der dei kunne koma og møtast og ta ein drøs, avslutta Svåsand.
