– Ein glipp som ikkje må skje igjen
Are Traavik hevdar kommunen ikkje informerte Ølve Montessoriskule om den komande sommarskulen. Det reagerer han sterkt på.
Kvinnherad kommune skal arrangera sommarskule i vekene 25, 26 og 27. Kommunen har fått 1,5 millionar kroner av Utdanningsdirektoratet til sommarskulen, slik at tilbodet vert gratis for alle deltakarane. Kvar elev kan delta på to kurs, og får til saman éi veke med sommarskule.
Men like før påmeldingsfristen 18. mai var ikkje Ølve Montessoriskule og elevane der varsla om prosjektet. Det fann Are Traavik (Sp) ut då han tok kontakt med skulen fire dagar før fristen gjekk ut.
Artikkelen held fram under annonsen.
– Det er kjempeflotte aktivitetar på sommarskulen. Diverre har ikkje informasjonen kome fram til Ølve Montessoriskule. Det synest eg var særs uheldig. Eg vonar på betre dialog mellom Ølve Montessoriskule og administrasjonen i Kvinnherad kommune, for dette var ein glipp som ikkje må skje igjen, sa han frå talarstolen i kommunestyret på torsdag.
Brev frå rektor
Seinast i januar omtalte Grenda eit brev frå rektor ved Ølve Montessoriskule der ho skriv om utfordringar knytt til samarbeidet med kommunen. Ho nemnde at ho ved to høve tilfeldigvis hadde oppdraga at Ølve Montessoriskule ikkje hadde fått informasjon som dei andre skulane i Kvinnherad hadde fått. Sektorleiar Anne Sofie Bjelland Kjeka uttale at ho synest det var trist at rektor opplevde situasjonen slik, men kjende seg ikkje att i kritikken.