Ein fot innanfor den amerikanske marknaden

– Vi reiste bort for å lansere boksen Skave, som no blir sett i produksjon. Messa me stilte ut på var mellomstor og samfunnet var nok enno ikkje heilt attende til normalen etter covid. Men besøket var godt, med fleire designarar, produsentar og presse. Heile opplevinga var veldig fin, og me koste oss der borte, fortel han.

Produsenten som skal realisere Skave, eitt av tre skrin i serien designtrioen Ytre har designa, er Fram Oslo. Dei hadde ein stand på designmessa New York Design Week og ICFF (International Contemporary Furniture Fair), der sju norske design vart stilt ut.

Designtrioen Ytre vann høgthengande pris: Skave inntar Manhattan

Skilte seg ut

Produsenten ynskjer å få ein fot innanfor den amerikanske marknaden, og deltakinga på messa var ein del av denne strategien. Med i dette dragsuget blir såleis også Ytre sitt design, som både vart lansert og prisgjeve i New York.

Under same tak som andre designarar frå heile verda skilte den norske standen seg ut. Hatteberg poengterer at andre land har andre preferansar på materialforståing, stilval og bruksområde, noko som bidrog til at Fram sin stand tydeleg skilte seg ut i mengda.

– Det nordiske uttrykket er litt nedpå, det er fint og minimalistisk, noko som blir veldig tydeleg på ei slik messe. Vi skilte oss ut blant dei andre og det var kjekt å sjå. Merkelappen «skandinavisk design» har verkeleg fått fotfeste rundt i verda, og ein ser element frå skandinavisk design bli tatt opp i andre land. Likevel er det ei slags nedpå haldning som går att i produkta og designa frå norden, fortel Hatteberg.

Fram Oslo sin stand «Inside Norway» var designa av Tobias Berg, eit arbeid som i følgje Njål var svært godt utført.

– Tobias hadde fletta produkta saman på ein veldig god måte, noko som er ein eigen kunst å få til, rosar han.

Njål møbeldesignar

Design som historieforteljing slår an

Noko av det som blir etterspurt av den amerikanske marknaden i dag innan design, er at det ikkje berre skal vera eit produkt, men gjerne også ha ei historie ved seg. Dette er noko som høver godt i samband med Skave, som mellom anna ber i seg element frå vestlandsarkitekturen i ornamentikken.

– Slike små forteljingar bidreg godt, og gjer det lettare å få produktet «ut der». Det er dessutan ein fin måte å jobba med design og arkitektur; det å sjå på kva som er og har vore, og presentere det i ny innpakning eller på ein ny måte, meiner den unge møbeldesignaren.

Hatteberg har eitt år att på si masterutdanning ved KMD i Bergen, og på vegne av designtrioen Ytre meiner han dei har vore heldige som allereie har fått ein fot innanfor hjå ein norsk produsent. Framover vil dei freiste å delta på utstillingar, og takke ja til dei tilboda som kjem.

Truleg i butikk til hausten

Og den nære framtida til skrinet Skave?

– Me er i siste fase no, så det blir truleg sett i produksjon i løpet av sommaren. Kanskje allereie frå hausten av kan det bli å finna i butikkar som fører Fram. Her i Bergen vil ein såleis finna det både hos Wallendahl og Røst, sluttar han.

Skave; skjære, skrape, spikke (av) med skarpt reiskap