– Ei viktig investering for oss

– Her har det blitt fint. Vi har litt småting igjen å gjera, men det har blitt veldig bra. Dette er ei viktig investering for oss.

Det seier dagleg leiar Bernt Bjørsvik når han viser Grenda rundt i dei nye verkstadlokala. På baksida av anlegget har det no kome eit tilbygg på om lag 130 kvadratmeter. Saman med litt ombygging av eksisterande lokale, har det gjeve mykje meir plass for karosseriavdelinga. Det har mellom anna resultert i to forarbeidssonar og ny lakkboks frå Italia.

Bernt Bjørsvik forklarar bakgrunnen for utvidinga slik:

– For det fyrste har vi god tilgang på oppdrag, og det er stort behov for karosseriarbeid. For det andre hadde vi lyst å oppgradera for å få eit godt anlegg og gode tilhøve for dei som jobbar her. Det er kjempeviktig å ta vare på dei vi har, slik at dei blir verande og trivst. Vi har investert mykje i dette anlegget, men det handlar om helse og miljø.

– Det var heilt klart trong for å gjera noko, legg han til, og nyttar høvet til å takka dei tilsette for å ha halde ut i den utfordrande perioden medan arbeidet stod på.

1 million

Dimmelsvik Bil har også investert i ein del nytt utstyr. Når Grenda er på besøk er bilopprettar Glenn Tore Mevik i ferd med å bruka den nye jiggen for fyrste gong.

– Dette er luksus! Bernt har vore snill med oss, smiler han.

I lakkboksen er Tor Inge Oftedal, avdelingsleiar for karosseri og lakk, i gang med å spraya eit panser raudt.

– Boksen har eit sterkt vifteanlegg, så ein kan stå der og jobba utan å risikera å få noko i seg, seier Bernt Bjørsvik, og lurer på om dei no kan blanda kring 100.000 fargar.

– Nei, det er sikkert nærare 1 million. Vi kan blanda alle fargar. Det einaste vi ikkje har er krom, korrigerer Oftedal når han har teke av seg verneutstyret.

Han er ikkje minst glad for at alt karosseriarbeidet no er samla på ein stad.

– Før måtte vi køyra bilane ut i regnet og rundt til framsida, fortel han.

Fleire tilsette

Dei som passerer gjennom Dimmelsvik vil kanskje leggja merke til at det no heng eit gult Mekonomen-skilt på veggen til bilverkstaden.

– Vi er både ein merkeverkstad for Toyota og ein frittståande Mekonomen-medlem. Det betyr at vi kan ta i mot alle bilmerke, ikkje berre Toyota. Og bilskadar vert det i framtida òg, uansett om det er fossilt, elektrisk eller hydrogen. No driv vi faktisk med absolutt alt, utanom Tectyl, opplyser Bernt Bjørsvik.

Dimmelsvik Bil har i dag 26 tilsette inkludert bensinstasjonen. Til saman utfører dei 20 årsverk. Den siste i flokken er Atle Reime Johansen frå Herøysundet, som byrja i jobben som bilseljar i sommar. Han vart då kollega med Halvard Vågen. Men firmaet har stadig behov for fleire tilsette.

– Vi er på jakt etter meir folk. Spesielt treng vi karosseriopprettarar og lærling på karosseri, seier Bernt Bjørsvik.