Ei veke for naturmangfaldet

Tysdag 14. januar heldt Nikolai K. Winge frå firmaet Holt og Winge, som driv med juridisk kompetanse for dagens og morgondagens utfordringar innan arealforvalting og miljø, eit innlegg om ivaretaking av naturmangfald og kommunalt handlingsrom innanfor eksisterande lovverk.

Lina Hamre og Kjersti N. Finne frå Voss herad snakka om kommunedelplan for naturmangfald og Egil Hauge ved Statsforvaltaren i Vestland hadde innlegg om planlegging i sjø og konsekvensutgreiing.

Onsdag, torsdag og fredag vert det nye webinar. Onsdag er temaet «Den ville, vakre og sårbare Vestlandsnaturen». Tore Larsen og Stein Byrkjeland frå Miljøavdelinga ved Statsforvaltaren i Vestland snakkar om Vestlandsnaturen – kva vi har og korleis vi kan ta vare på den og Anders Mossing frå Villreinsenteret Sør vil snakka om Villreinen som arealkrevjande art.

Regnskogen

Torsdag er temaet Landbruk, naturbeitemark og skog, og her vil Øyvind Vatshelle frå Statsforvaltaren i Vestland snakka om den nye gjødselbrukforskrifta og korleis denne kan påverka naturbeitemarkane. Etterpå vil John Bjarne Jordal ved Miljøfagleg utredning snakka litt om Naturbeitemarkane i Vestland, om mystikk og miljøverdiar på areal som kan bli lite verdsett, før Magnus Johan Steinsvåg og Gro Kampp Hanssen ved Statsforvaltaren held innlegg om den sårbare vestnorske regnskogen.

Fredag skal det handla om Karbonlagring; til lands og til vanns og i kommunane med! Forskar Anders Lyngstad ved NINA (Norsk Institutt for Naturforsking) vil fortelja om karbonlagring i naturtypar på land, før Gunhild Borgersen frå NIVA (Norsk Institutt for Vannforsking) fortel om karbonlagring i marine naturtyper og område.

Tone Ankarstrand frå Stavanger kommune avsluttar med eit innlegg om korleis kommunen kan få kunnskap om sine karbonrike områder og bruka denne kunnskapen best mogleg i den kommunale kvardagen.