Denne helga var det omsider Kvinnherad sin tur til å skipa til seriehelg for u15 og u17 sine volleyballag. Her er to av dei lokale laga, IL Trio og Strand-Ulv i hard kamp mot kvarandre om laurdagens fyrste siger.

Ei «smashing» helg

Volleyballsesongen er godt i gang og for fyrste gong på mange år vart det arrangert seriehelg i Kvinnherad.

Journalist i Grenda
Publisert Sist oppdatert

Heile helga har Kvinnherad Arena og Husneshallen vore fylt med ungdomar som har serva, smasha, heia og kjempa. Laurdag var sett av til u17 og både Trio og Strand-Ulv stilte med to lag på jentesida. Strand-Ulv stilte også med eit u17-lag på gutesida.

Litt glissent var det på tribunane, men dei som hadde teke turen for å heia og støtta tok jobben på alvor.

Tribunane såg noko glisne ut, men dei som var med visste å gje lyd i får seg på die hielt rette plassane. Her er Strand-Ulv sit GU17-lag i full sving mot Kvernbit 2 frå Frekhaug.

Tap og vinn

Klokka 10.45 tok dei fyrste kampane til, og på bane 3 møttest Strand-Ulv 2 og IL Trio 1. På nabobanen kjempa IL Trio mot Kvernbit IL, som hadde teke turen heilt frå Frekhaug like utanfor Bergen. I dagens fyrste kamp for desse volleyballspelarane var det Strand-Ulv 2 og Kvernbit IL som stakk av med sigeren.

- Det gjekk bra, me vann. Me plar eigentleg spela dårleg fyrste kampen, då er me ofte lite positive, litt trøtte og treige. Men så blir det mykje betre i dei neste kampane, uttalte ei smilande Merethe Gårder Eikeland frå Strand-Ulv 2 like etter kampslutt.

Medan Strand-Ulv-jentene var godt nøgde etter den fyrste kampen, var ikkje motstandarlaget like positive.

- Dette var ille, eg hatar å tapa, innrømte ein av spelarane.

- Det går fint, det er sånt som skjer, kontra ei lagveninne.

Trenaren derimot, Sille Tars, skrytte av spelarane sine.

- Eg er stolt av dei, dei prøvde godt og dei hjelpte kvarandre. I tillegg var dei éin spelar færre på banen heile kampen. Det er inga unnskyldning sjølvsagt, men det er jo heilt klart ein fordel å vera fulltalig, konkluderte trenaren.

- På toppen av de heile så var det ein av spelarane våre som hadde sin aller fyrste kamp etter å ha vore vekke lenge på grunn av ein skade. Så ho var sjølvsagt litt nervøs, la Tars til.

Heller ikkje det andre laget frå Trio, som spela mot jentene i Kvernbit IL, gjekk sigrande ut av sin kamp. Derimot såg dei litt lysare på eigen prestasjon.

- Det gjekk greitt. I periodar var me veldig på, og så av og til vart me litt daffe. Me tapte, men så var me også éin spelar mindre på banen, fortalde spelar nr 31 Veslemøy Seim Stussvik.

Laurdag var det u17-laga som kjempa om sigrane. Sundag var det u15-spelarane sin tur til å bryna seg mot kvarandre.

Merethe Gårder Eikeland for Strand-Ulv med ein retteleg dugleg smash.
– Det har vore ein bra sesong så langt, me er godt nøgde, sa assistent, hjelpetrenar og støtteapparat Kjell Sundfjord om årets kampsesong. Her med fullt fokus på det som skjer på bana.
IL Trio tapte sin fyrste kamp for dagen mot Kvernbit IL. Frå venstre: Veslemøy Seim Stussvik, Ariel Engelsen Øvrevik, Kaia Seim Stussvik, Inger Helen Skarveland, Kristina Rød Heimvik og trenar Sille Tars.
IL Trio 1 etter sin fyrste kamp. Bak f.v.: Petrikke Fredlund, Tiril Elise Sunde, trenar Sille Tars og Laura Veronika Durskat. Framme f.v.: Abigail Onate og Trinelinn Lee.
Strand-Ulv 2 vann sin fyrste kamp mot IL Trio 1. Bak f.v.: Julie Bjørkelund, Jenny Håland Lie, og Silje Flatebø Skare. Framme f.v.: Zuzia Ostrovska, Marie Traavik og Merethe Gårder Eikeland.
idrettsanlegg aldersbestemt idrett sport nyhende
Powered by Labrador CMS