Ei skikkeleg vitamininnsprøyting
Det var tett mellom høgdepunkta då Strupebandet inviterte til førjulskonserten «Gled deg du jord» på Halsnøy Kulturhus. Dei leverte ein variert og flott konsert.
– No kan me senka skuldrene, oppfordra konferansier Helén Petersen i starten av Strupebandet sin konsert.
Ho kunne like gjerne ha bede publikum om å finna fram danseskoa, for det var mange energiske innslag på programmet. Opningsnummeret, ein forrykande versjon av «Joy to the world», var eitt av desse. Heile konserten var oppkalla etter denne songen, «Gled deg du jord».
Annonse
Rein musikkglede
Tittelen passa bra, for var det noko som vart formidla frå scena, så var det rein musikkglede. Denne gleda smitta tydeleg over på publikum, folk klappa med i musikken, og det var stor jubel etter mange av songane.
Som vanleg stilte koret med mange dyktige solistar, som var med på å gjera konserten variert. Dei hadde med sitt faste orkester, som viste godt samspel både mellom kvarandre og med dirigent Kari Tarberg.
Det var også gjester med i programmet denne kvelden. Ingeborg Grønseth sjarmerte heile salen då ho i julepynta kostyme framførte «Last Christmas» av George Michael. Egil Vaage bidrog med både fiolin og hardingfele under eit av dei meir vare innslaga, «Mitt hjerte alltid vanker». Dette var eit av høgdepunkta under konserten, og denne tilhøyraren skulle gjerne høyrt Vaage sitt felespel på fleire innslag.
Annonse
Taket løfta seg
Nokon av jentene i barnekoret Perlene hadde også fire gjesteinnslag, under leiing av Maria Hansen, og det var nok mange som vart rørt av den fine framføringa deira. Konferansier Helén Petersen følgde publikum gjennom konserten med stor ro og varme.
Det var med andre ord mange «stjerner» med på denne konserten. Men den største stjerna av alle, var sjølve Strupebandet. Koret song musikk av fleire sjangrar, både folketonar, klassisk, pop og gospel.
Det var kjekt å høyra musikk av både Händel og John Rutter. Taket løfta seg under dei flotte gospel-innslaga, mellom anna «Go tell it on the mountain», som var endå eit høgdepunkt.
Salen var stappfull av begeistra tilhøyrarar denne kvelden, og det skulle visst bli heilt fullt også på laurdagskonserten. Det fortener alle dei involverte. Det er tydeleg at Kari Tarberg og Strupebandet har lagt ned mykje arbeid i innøvinga av konserten. Dette var eit flott arrangement, som gav rein glede til publikum.
