Trio Tunell avslutta ein særs vellukka Rock and Bolle laurdag ettermiddag føre eit ungt og engasjert publikum.

Ei overveldande opning for Fest i Valen

Laurdag opna Valen Ranch dørene og starta årets Fest i Valen med å invitera til Rock and Bolle for små og store. Det skulle kjapt visa seg å vera populært blant mange.

Journalist i Grenda
Publisert Sist oppdatert

Trass i tunge skyer som skugga for den førehandsmeldte sola, var det likevel god kø for å koma inn kort tid før fyrste artist stod på scena. Publikum såg uansett ut til å storkosa seg på bakkane til Ranch-paret Torill Berger og Ståle Eskelandt.

Berger og Eskeland ynskte alle gledestrålande velkomne og starta festen før alle hadde rukke og kome inn porten.

– Det er så kjekt å få ha eit arrangement for familiar, og ikkje minst få trekka fram unge talent. Ungdomar skal få scenetid, og i dag har me med oss tre unge band. Fyrste band ut er frå Stord og heiter AW0. Eg håpar de tek godt i mot dei, ropte Berger ut til stor applaus frå eit spent og ventande publikum.

Knutsen og Ludvigsen-stemning

AW0 inntok scena og starta settet sitt med å takka Valen Ranch for å for å få vera der.

– Det er så kjekt å vera her med alle dykk i dag, sa vokalist William før konserten offisielt var i gang.

Andre band ut var Kvinnherad-bandet Wings of Sorrow som sørga for eit realt sjangerbyte med sin harde, men fengande, metal-musikk.

Dette var sett stor pris på av mange, men langt i frå alle då nokre vart observerte med fingrane i øyrene. Publikum såg likevel ut til å kosa seg, anten ved å kjøpa sukkerspinn og popcorn, leika i graset eller digga og dansa til musikken.

Dei som derimot trakk flest publikummarar fram til scena var likevel Rock and Bolle sitt siste band ut, nemleg Trio Tunell som på erfarent vis visste å skapa god Knutsen og Ludvigsen-stemning med låtar frå deira univers.

Ranch-vert og Primus motor Ståle Eskeland var heilt overvelda over det store oppmøte.

– Dette er heilt fantastisk, fullstendig overveldande. Me hadde vore nøgde med 150 besøkande, men no trur eg me har passert 200. No er me snart tomme for bollar, lo ein strålande nøgd Eskeland.

Sjå biletkavalkaden frå dagen nedanfor:

Torill Berger (t.v) og Ståle Eskeland (t.h) tok varmt i mot alle godt over 200 frammøtte før dei sparka i gang årets Rock and Bolle.
Publikum let seg rive med då Stordabandet AW0 var på scena.
AW0 gjorde ein strålande framføring på scena, trass i litt trøbbel med lyden.
Wings of Sorrow brakte metal-musikken med seg til Valen og sørga for skikkeleg rockefestival-stemning, til både glede og frustrasjon blant publikum.
Det yrte av liv og røre på bakkane til Valen Ranch under det særs vellukka familiearrangementet.
Denne gjengen storkoste seg på konsert og gledde seg over den gode stemninga og ikkje minst til å høyra musikken. Frå venstre: Sander, Ola, Sondre, Isak (bak) og Samson.
Så lang var køen for å koma inn på området at Ståle Eskeland og Torill Berger såg seg nøydde til å starta konserten før alle var komne inn.
Det var fulle tribunar og ein ranch som var pynta med staselege bilar.
Det var støtt og stadig lange køar ved begge matbodene, og det gjekk mykje i sukkerspinn og popcorn.
Wings of Sorrow klarte å lokka fram nokre få engasjerte og unge fans som heilt klart likte det dei høyrde.
Ranch-vert Ståle Eskeland (t.h) og grillsjef Ronny Augustsson var begge svært nøgde med dagen så langt.
festivalar nyhende kultur og underhaldning musikk
Powered by Labrador CMS