Ei oppleving for sansane: – Utstillingane går sin sigersgang rundt om i verda

Fotokunstnarane Marie Mons frå Paris og Jingyue Zhang frå Kina var på kunstnaropphald ved Halsnøy kloster i fjor. Under opphaldet vart dei inspirerte av dei flotte omgjevnadane Halsnøy har å by på, og av folk dei trefte på. Resultatet, som no blir utstilt i klostergalleriet, blei tankevekkande, variert og estetisk.

Søndag strøymde folk til for å få med seg utstillingsopninga. Helén Petersen ynska dei besøkjande velkommen, før ho i korte trekk fortalte om kunstnaropphalda og prosjekta deira.

– Det er kunstnarane Jingyue Zhang og Marie Mons som stiller ut her no i haust. Dei var på opphald hos oss i september til oktober i fjor, og arbeidet deira er fotokunst av høg kvalitet, sa Petersen før ho las opp Jingyue sin tekst om korleis ho opplevde vekene på klosteret.

– I løpet av dei tre vekene ho var på Halsnøy prøvde Jingyue å oppleva landskapet gjennom augo til ein stein; flyten av bølgjene, ropa frå måkane, gløden frå daggryet. Jingyue Zhang sitt prosjekt har fått namnet «Frå eit solgry».

Deretter bad Petersen dei besøkjande om å gå inn i bileta og oppleva dei.

Fokus på oppleving

I det innarste rommet i klosterkjellaren kunne ein sjå utstillinga til Marie Mons. Prosjektet har ho kalla «Worry strangness», og visar til ei oppslukande oppleving som ikkje slepte unna.

Marie opplevde omgivnadane i fargar inne på klosteret, og i svart kvitt på omverda.

– Ho opplevde at tida stod stille på denne staden. Ho fokuserte spesielt på det merkbare, og prøvde å fanga det sansane ikkje kan forstå, fortel Petersen.

Svært høgt nivå

Sunnhordland museum har sidan 2010 tilbydd kunstnaropphald, der det kjem nøye utvalde fotokunstnarar frå ulike hjørne av verda for å bu tre veker på Halsnøy kloster. Vekene vert fylt med kunst, kunst og kunst.

– Her kan dei berre vera, og dykka ned i dei kunstnariske prosessane. Dei jobbar sjølvsagt fritt, utan føringar frå oss. Men me er alltid tilgjengeleg om det skulle vera noko, eksempelvis om dei ynskjer å diskutera prosjekta sine eller treng råd og tilbakemeldingar, seier Øyvind Hjelmen, som er kunstnarisk leiar for A-i-R-prosjektet.

Prosessen med å velja ut dei heldige kunstnarane er ikkje enkel. Dei fleste søkjarane møter representantar frå Sunnhordland museum på ulike internasjonale fotofestivalar, som til dømes festivalen i Arles i Frankrike. Her reiser også Helén Petersen og Øyvind Hjelmen kvart år for å treffa kandidatar til kunstnaropphalda.

– Under intervjuet kan kandidatane visa fram tidlegare arbeid og fortelja litt om seg sjølve. Deretter startar utveljingsarbeidet, informerte Petersen.

– Kva ser dykk etter under arbeidet med å velja ut dei heldige?

– Me har mange søkjarar for kvart år, og det er eit svært høgt nivå på alle. Me ser sjølvsagt på arbeidet deira og om ideane deira er gode, men mest av alt ynskjer me å bli kjent med personen. Dei skal jo bu saman med tre andre menneske, og dei skal jo tross alt omgås meg i desse vekene, og eg er ikkje enkel, ler Petersen før Øyvind supplerer.

– Ein ting er arbeidet og ideane deira, men prosessen med å velja ut er og basert på variasjon. For oss er det viktig at dei jobbar i forskjellege retningar, slik at dei mest av alt kan inspirera kvarandre, men og koma med innspel og hjelpa kvarandre. Kvar og ein som har vore på opphald hjå oss skil seg ut. Dei bur og lever saman, men likevel tolkar dei sine omgivnadar på forskjellege måtar, smiler han.

Går sin sigersgang

I år var det totalt 38 søkjarar, og Helen Petersen er både stolt og glad over kunstnaropphald-prosjektet.

– Det som er fantastisk kjekt er at veldig mange av utstillingane som har vore på klosteret går sin sigersgang vidare i verda, faktisk i alle hjørne rundt om i verda, fastslår ho med eit stort og stolt smil.

Og tilbakemeldingane frå kunstnarane som har fått kunstnaropphald ved klosteret er svært gode.

– Ingen av kunstnarane har lyst å reisa frå staden, og difor kjem fleire av dei attende, og det er kjekt, fortel Petersen og Hjelmen.

Etter dei mange sanselege kunstopplevingane var det klart for litt å tyggja på. I klosterkjøkenet- og stova var det diska opp med nydelege vaflar, scones og kaker, som blei nytt over borda med drøs og kos.

Alle som vil sjå fotoutstillinga må ta turen til klosteret innan 18. september.