– Ei kjempehelg, musikalsk og sosialt

Det var 16 musikantar som reiste, og korpset var både det yngste og minste i konkurransen. Christine Egeland var ein av dei vaksne som var med på turen, som ho berre har gode ting å sei om.

– Vi kom jo på 6. plass med 87 poeng, i ein konkurranse med seks korps. Så mange poeng trur eg ikkje vi har fått før. Grunna litt sjukdom var det nokon som ikkje kunne bli med, og vi fekk difor låna Sebastian (Torjusen) på tuba, og Tor (Skeie Olsen) gjekk inn som dirigent i staden for Nick (Huges). Men det har absolutt vore ei kjempehelg! Då vi var på veg heim spurte fleire av ungane om me ikkje kunne snu og gjere det igjen, for det var så kjekt, fortel Egeland blidt.

Dei unge musikantane laga diskotek på eitt av hotellromma, og heile gjengen var på restaurant to dagar på rad. Dei fekk oppleve Grieghallen frå innsida, og ikkje minst fekk dei med seg konsertar frå andre dyktige korps.

– Vi fekk jo med oss festkonserten i Grieghallen, der Manger Musikklag spelte. Dei er jo knallgode, og mange av våre musikantar vart heilt «wow, er det mogleg å bli så god?!». Dei var mektig imponerte, forklarar Egeland.

Rosendal skulekorps hadde sin konsert i Peer Gynt-salen, og trass i at dei stakk av med sisteplassen i konkurransen fekk dei pallplassering i opplevinga.

– Ingen grense for kor langt de kan nå!

I tillegg hausta dei svært fine kommentarar frå dommarane. Ein av dei, Marius Fevang Thorstensen, noterte seg mellom anna følgjande:

«De er eit ungt korps, og eg blir imponert over kor moden sound de har! Alle er flinke til å ta skikkeleg ansvar for sine stemmer, og det er tydeleg at de tykkjer det er gøy å spele musikken de speler! Intonasjon er også imponerande god, og det er tydeleg at de har gode lærarar og dirigentar, med sunne ideal. Hald fram å ha det gøy saman, og med å øve like mykje heime som eg er sikker på at de gjer – då finns det ingen grense for kor langt de kan nå!»

Sjølv om Hordablæsten 2022 er over, og mange har fått vore på korpstur for første gong i sitt liv, legg dei ikkje notane vekk heilt med det første.

– Den 17. mars arrangerer vi vårkonsert med åresal i Rosendal samfunnshus. Då speler vi gjennom Hordablæsten-programmet vårt igjen, opplyser Christine, og legg til at dei ser fram til å spele på heimebane.