Ei høgtideleg jubileumsfeiring

Ein festpynta sal vart fylt med fleire hundre smilande gjester i ført finstasen. Korpsleiar Reidunn Seim Steffensen, som har leia skulekorpset i tre år, tok i mot og ønskte kvar og ein velkomen til feiringa.

– Det er skikkeleg kjekt at så mange har teke turen. Det er ein festdag som verkeleg forten å merkerast. Me har leigd inn Sebastian Lamberg Torjusen for å gjere ekstra stas på feiringa. Han skal vera konferansier og dirigere skulekorpset i kveld. I tillegg skal han saman med kvintetten frå elitekorpset Eikanger-Bjørsvik musikklag framføre både åleine, men og saman med skulekorpset, fortel Steffensen.

Skulekorpset vart stifta i 1961, og i løpet av 60 år har det sjølvsagt svinga opp og ned med rekrutteringa. I dag er det 22 musikantar i korpset, og fleire av dei spelar i A- eller B-gjengen til Rosendal musikklag.

– Rekrutteringa har gått opp og ned sidan skulekorpset vart til, men i dag er det betre ein nokon gong. Det er heile 22 musikantar frå 8 til 16 år, og det er fantastisk kjekt, smiler Steffensen og legg til:

– Det er også verdt å nemna at det er heile elleve aspirantar her ikveld, og det er skikkelig stas.

Steffensen starta markeringa med å sei nokre fine ord om skulekorpset, som vart motteke med rungande applaus frå salen:

– Etter 60 år er det mange som sit igjen med ulike minner. Mellom anna vennskap, korpsturar, sveitte lepper og tårer, ei uniformsbukse som klør, ein kjølande is i skuggen av eit tre - ein glovarm 17 mai. Bussturar ut og inn av landet, vår og haustkonsertar, gutar og jenter på tvers av alder, men ikkje minst det å høyra til eit fellesskap der det ikkje finst reservebenk.

Programverten for kvelden var som nemnt Sebastian Lamberg Torjusen, som sjølv har spelt i skulekorpset i mange år. Med utgangspunkt i det, fortalde han litt om korleis det er å spela i korps, og med sin naturlege måte å leia på, fekk han fram både tårer og latter frå gjestene.

– Ein yngre jubilant har vell ein ikkje sett før. Eg ønsker å byrja med å sei nokre ord om korleis det er å spela i korps. Nokon likar det, og nokon ikkje. For å setja i gang ein assosiasjon hos kvar og ein, kva gir dykk ei god kjensle? Eg går ut ifrå at nokon kanskje tenkjer å gå på toppen av eit fjell, vaska huset, eller ei innlevert oppgåve. Det er mange eksemplar som gir oss ei god kjensle. Desse nemnte tinga handlar om meistring. Du lukkast å halda orden i heimen din, levere ei god oppgåve i tide, og koma deg på toppen av fjellet. Slik er det med musikk også, mellom anna når du lærer deg eit nytt alfabet, fortel Sebastian og held fram:

– I korpset er du ikkje åleine om meistringa, men ein del av ei større rørsle. Kjensla av meistring får du uavhengig av alder og kjønn. Du får den når du får applaus, eller når du held konsert utanfor ein gamleheim på 17 mai. Korpset handlar ikkje om kva som har skjedd dei siste seksti åra, men at kvar og ein har fått kjent og delt på meistring.

Under jubileumsfeiringa fekk skulekorpset overrekt ei gåve frå Sparebank 1 stiftinga på 25.000 kroner.

– Dette er heilt fantastisk. Slike gåver er gullverdt, og skal nyttast slik at det kjem musikantane våre til gode, smiler ei nøgd og glad korpsleiar.

Både skulekorpset og kvintetten frå Eikanger-Bjørsvik imponerte og underhaldt på ein framifrå måte. For fleire av musikantane var dette deira første framføring med publikum, men det var det nok ingen som verken kunne sjå eller høyra. Her kunne kvar og ein venda heim att med ei kjensla av meistring.

– Me turte ikkje å håpa på at det kom så mange, men salen vart full og feiringa gjekk over all forventing, sluttar Steffensen.