«Ei hjelpande hand for Ukraina»: Plakaten er klar

Ordførar Hilde Enstad skal halde appell på arrangementet, medan Peder Sjo Slettebø blir kveldens konferansier. Konserten blir på halvanna time, og fleire lokale band skal syta for at desse 90 minutta blir knakande gode.

Annemor Ekeland, som er ei av dei som arrangerer støttekonserten, fortel om utelukka positive artistar.

– Det er veldig mange som kunne tenkt seg å bli med, og sjølv om plakaten er klar, kan det enno koma nokre fleire namn. Men dei verkeleg store namna er jo Elsie Bay og Marion Woodseth, seier Ekeland.

Arrangerer stor støttekonsert

Saman med desse dyktige kvinnene vil også Husnes Funk Orchestra, Sløyden Rock, Bjarne Øymyr og Humming Beez underhalda publikum laurdag 9. april. Initiativet til konserten kom frå Humming Beez, og etter kvart som andre lokale artistar har blitt førespurt, har det vore ja heile vegen, ifølgje Annemor.

Mange ynskjer å støtte

Ho informerer vidare om at det er mange verksemder, lag og organisasjonar som ynskjer å støtte aksjonen med pengar.

«For at billettinntekter og innsamla midlar skal koma i rette hender er det Kulturhuset Husnes sine kontoar som skal brukast til dette føremålet. Dei vil og føre rekneskap over aksjonen. Alt overskytande frå konserten vil så gå direkte til Norges Røde Kors si satsing i Ukraina. Er ein hindra frå å gå på konserten kan ein også kjøpa støttebillett til kr 250,- pr stk.», skriv ho i ei pressemelding.

Betalingsinformasjonen kan ein få ved å gå inn på Kvinnherad kultursenter si side, kor ein også kan kjøpe billettar til arrangementet.