Egget-direktøren: – Milepåle for oss

– Dette er ein kjempestor milepåle for oss, smilte teknisk direktør Åsmund Hellesøy i Ølve på torsdag.

Han representerer utbyggjaren Ovum, som fram til Egget-lanseringa på torsdag var kjent som Hauge Aqua Solutions. Dei er ikkje aleine om å tenkja på lukka anlegg for laksen.

– Ser me stort på det, så er det er fleire og fleire av desse store konsepta som kjem i oppdrettsnæringa. Viss det berre hadde vore eitt initiativ, så er det ikkje sikkert at det hadde blitt noko endring i oppdrettsnæringa. Det finns andre som liknar, og dei er viktige, det har blant anna vore andre i sjøen før «Egget» kjem der. For Hauge Aqua er det vårt første, forklarer han.

– Herde hevdar seg

Blant dei som var i lag med Hellesøy med båten frå Bergen til Ølve var designteamet for det store egget som selskapet skal byggja seinare.

– Sjølv om dette egget er stort, så blir det neste dobbelt så høgt og breitt, og rommar mykje, mykje meir. Egget som me er her for i dag er eit pilotprosjekt, og me skal fylla det opp med teknologi for å overvaka alt inne i Egget best mogeleg. Resultata me får att frå dette skal me bruka på dei store egga, forklarer han vidare.

Snart skal det kjempast om oppdraget med å laga dei verkeleg store egga.

– Herde dei hevda seg i internasjonal konkurranse for å få kontrakten på det første egget, og har vist imponerande evne og motivasjon til å koma i mål med denne prototypen. Det er kanskje mange i Kvinnherad som ikkje veit kva kompetanse Herde har her på fabrikken i Ølve. Det er heilt fantastisk kva dei får til, skryt 49-åringen.

Kontrakten på dette Egget kunne ha hamna i Nederland eller Tyskland, og det ville gjort oppfølginga til den tekniske direktøren meir krevjande.

– Det har vore veldig kjekt å ha bygginga så nær oss som dette. No har bygginga føregått halvannan time frå kontoret vårt i Bergen, og me har kunna følgja prosjektet godt og tett, meiner han.

Føremonnar

«Egget» skal sjøsetjast i mai. Etter testing og sjøprøvar skal det fraktast til ein lokalitet ved Gjermundsnes i Romsdalsfjorden.

– Det er tre store føremonner som Egget og andre lukka anlegg handterer på ein god måte: Det samlar opp slammet, det er veldig rømingssikkert og du får trygt vatn inn, som gjer at ein får kontroll på luseproblemet, påpeikar Hellesøy.

Egget skal etter planen ta fisken opp til eitt kilo før han blir sett ut i merdar i fjorden. Hauge Aqua-eigar Cato Lyngøy illustrerte verdien av det blant anna ved å forklara at ein større fisk er sterkare og meir robust, og toler eventuell sjukdom og lus betre enn ein liten fisk. Hellesøy påpeikar også nokre av føremonnane med å ala opp fisken i sjøen-

– Det er alltid kjekt å bruka fotballsamanlikningar. Viss du skal byggja eit fiskeoppdrettsanlegg på land, så treng du stadionet til Real Madrid i areal, så det er like greitt å la «Egget og liknande» flyta i sjøen, sluttar Hellesøy.