– Eg vil vera ei som bidreg til eit levande bygdesamfunn

Ida Håvik (27) flytta heim til Kvinnherad i fjor sommar. Ilag med sambuaren Jonas Nygaard Bårdsen (30) og sonen Ulrik (9 mnd) har ho busett seg i Ølve.

– Eg har alltid hatt eit sterkt ønske om å flytta heim til Ølve. Eg har budd i by i nokre år, men eg er bygdejenta og ville heim, fortel Ida, og legg til;

– Eg hadde ein veldig fin oppvekst her i Ølve, og vi ynskjer det same for guten vår. Eg har familien min her og det betyr mykje for oss å ha dei i nærleiken.

Bustad og arbeid

Ida og Jonas er begge lærarar, og fekk seg raskt jobb, ho på Uggdal barneskule og han på Tysnes ungdomsskule.

– For å kunna flytta heim igjen er ein avhengig av at ein del ting klaffar. Finnest det til dømes arbeidsplassar? Stad å bu? Tilbod til både barn og foreldre? Vi var heldige som hadde ei attraktiv utdanning og fekk oss jobb på Tysnes, fortel Ida.

På toppen i Storhaugen, det største byggefeltet i Ølve, bur Ida, Jonas og Ulrik i eit hus med plommetre i hagen.

– Det er veldig stor forskjell på å bu i by eller bygd. Det er sjølvsagt fordelar og ulemper med begge, men ein får eit rolegare liv på bygda, noko vi set stor pris på, fortel Ida, og legg til;

– Attraktive bustadtomter og folk som kan bygga er noko av det viktigaste ei bygd kan tilby. Eg veit om mange som vil flytta heim, men som ikkje finn arbeid- eller bustadplass. Her i Ølve har vi eit flott nytt byggefelt med mange moglegheiter, så hit er det berre å flytta.

Barnehage er alfa og omega

Folketala for Kvinnherad frå starten av 2023 til så langt i 2024 viser ei vekst på 120 personar. Andre kvartal i 2024 var det ei vekst i folketalet på heile 57 personar. Ida fortel at det er veldig mange som har flytta heim til Ølve og Hatlestrand dei siste åra.

– Eg trur at ganske mange av dei 120 har flytta heim til Ølve. Eg tør ikkje heilt å seie kor mange, men det er minst ti nye par og småbarnsfamiliar som har kome hit dei siste åra, seier Ida.

Ho meiner at fleire og fleire ser kor greitt det er å bu i ei bygd kontra i by.

– Her på bygda saknar vi eigentleg ingenting. Her har vi alt i nærleiken, både barnehage, skule, matbutikk og natur. Det gjer livet med små ungar enkelt og greitt, fortel ho.

I 2021 gjekk det tre ungar i Ølve barnehage og den vart truga med å bli lagd ned. Året etter var dei oppe i 9 ungar og etter nyttår vil alle dei 26 plassane vera fylte.

– Det er flott at barnehagen vart verande. Det er ikkje så langt til Hatlestrand frå Ølve, men for oss som jobbar på Tysnes hadde det blitt 30 minuttar ekstra køyring om dagen viss vi skulle levert Ulrik på Hatlestrand. Det betyr mykje å ha barnehage rett i nærleiken, seier Ida.

Bidra til eit levande bygdesamfunn

Ida er med i Ølve bygdelag og er motivert for å vera med på å få til kjekke ting for bygda.

– Eg har lyst til å vere ein bidragsytar som kan koma med idear og legga til rette for fleire aktivitetar og tilbod i bygdene våre. Det er mange eldsjeler rundt om her og det motiverer meg til å vera med på laget, fortel ho, og legg til;

– Det er viktig at vi har levande bygder med både idrettslag, ungdomslag, skyttarlag og mykje anna. Det gjer kvardagen kjekkare sosialt, noko som er viktig for bygdesamfunnet.