«Eg vil takka kvar og ein av dykk, som i over ni månadar har fått liva sine snudd på hovudet»

Kjære kvinnheringar

Jule- og nyttårshelsing frå ordførar 2020

Adventstid går over til julehøgtid, i eit år som på så mange måtar har vore ekstraordinært og spesielt.

Me har vore vitne til, og vore del av, eit samfunn i unntakstilstand gjennom store deler av 2020.

Sjølv var eg i Oslo, då landet vart stengt ned, og forstod raskt at situasjonen me då stod i var alvorleg. Stortinget blei over natta stengd, og det blei erklært ei tung form for unntakstilstand over det ganske land frå Statsministeren neste dag. På få timar og dagar etablerte Kvinnherad kommune kriseleiing, for å handtere alle dei utfordringar og oppgåver dette gjorde krav på. Omfanget av det som skulle møta oss, var det dei færraste som kjente til.

Utover våren, gav kvardagen vår fornya håp om at me var på veg ut av dette ulende. Borna kunne ta tilbake skulane og barnehagane. Og litt seinare kunne og dei eldre ta i mot besøk frå næraste familie.

Gjennom heile sumaren og hausten har me levd med strenge smittevernsreglar hengjande over oss, i håp om at vaksine skal bli tilgjengeleg for heile verda. Ein vaksine som me i dag veit kjem til landet om berre få dagar. Me har no starta reisa i å ta tilbake livet, kvardagen og ikkje minst kunne gje kvarandre ein god varm klem.

Eg vil med mi julehelsing i år få takka kvar og ein av dykk, som i over 9 månader har fått liva sine snudd på hovudet.

Til alle foreldre som måtte organisere leik og heimeundervisning for borna.

Til alle som blei avskore frå å besøkje sine foreldre, besteforeldre og oldeforeldre.

Til alle som har jobba intenst og iherdig for at samfunnet vårt skal halda saman.

Til alle som har fått ein tyngre kvardag, som har mista jobb eller inntekt.

Til alle som ikkje kunne treffe vener og familie, og som i år ikkje kan feire jul heime i Kvinnherad.

Og ikkje minst til alle som i løpet av denne tida har mista nokon ein var så glad og kjær i, men grunna sjukdom har gått bort og ikkje er blant oss lenger.

Mi julehelsing er til dykk alle, som del av vårt lokalsamfunn har klart å få endane til å møtast.

Når me no går inn i julehøgtida, er det med visshet om at 2020 snart er eit historisk faktum.

Jula betyr mykje for mange. Det er ei tid me forbinder med kyrkja og tru, familie, god mat og hyggeleg samvær. Alt det ein ynskjer seg mest av alt i år.

Julehøgtida gjev oss litt av dette, men samfunnsreglane festar framleis strenge reglar for korleis desse siste dagane av året blir. For mange er det å gå i kyrkja på julaftan eit høgdepunkt. Med ei teknologisk og framtidsretta kyrkje i Kvinnherad, kan me alle ta del i den digitale julegudstenesta i år. Ei gudsteneste som eg har stor von om skal gje oss styrkje i trua på eit betre liv.

Jula kan og for nokre være tung, då ein av ulike grunnar har vonde minner eller opplevingar knytt til denne tida. De skal alle vite at me er her for Dykk, og Kvinnherad kommune skal være ein raus og omsorgsfull kommune å leva og bu i.

 

Eit betre 2021

Ei flott oppleving gjennom mørketida er å sjå til alle husa og hagane i alle bygder som er pynta med ljos for ei mørk årstid. Ljoset og varmen, trur eg gjev oss den styrkja me treng inn i eit nytt år. For mykje positivt skal kome til å skje i 2021.

Med oppstart og start av B-hallen hjå Hydro Husnes tidlegare i haust, og ein eventyrleg turistsesong med store besøkstal frå heile landet i sumar, gjev dette grobotn for eit sterkt og innovativt næringsliv og arbeidsplassar. 2020 har sanneleg gitt oss mange gode opplevingar òg, som igjen vil gje oss framtidsvon.

Kvinnherad kommune skal bli ein kommune som i enno større grad bidreg til auka verdiskaping og utvikling. Ei aktiv og framtidsretta satsing på bustad- og arealutvikling, vil merkast i åra som kjem, etter at dei folkevalde no i desember har løyvd store investeringsmidlar for desse områda.

Og attpåtil kom det ein unik moglegheit denne veka, der kommunen no melder seg på i konkurransen om å få etableringa av batterifabrikk til Kvinnherad og regionen vår. God dialog og målretta arbeid saman med Hydro og dei andre partane som står bak etableringa, vil forhåpentlegvis kunne gje resultat.

Til slutt vil eg helsa alle dei som i jule- og nyttårshelga skal arbeide, og syte for at funksjonar og oppgåver blir løyst i kommunen vår.

Eg vil senda eit stort takk og uttrykka stor takksemd for at eg får være ordførar i Kvinnherad. Det er eit privilegium å få tena innbyggjarane, og kommunestyrerepresentantane. Ingen sak for liten, ingen for stor. Til ordførar kan alle koma, med det ein skulle ha på hjarta.

Med desse orda, vil eg ynskje alle ei velsigna og god julefeiring.

Ta vare på kvarandre inn i det nye året.

Vyrdsam helsing frå Hatlestrand julaftan 2020

Hans Inge Myrvold, ordførar